26.11.2024 | 17:18
Հայելիով տեսա, որ հարգելի պատգամավորը խփեց հեռախոսին. ավտոբուսի վարորդ․ ՏԵՍԱՆՅՈՒԹ
Սերբիան համաձայնության է եկել ռուսական գազի մատակարարումների շուրջ՝ անտեսելով ԵՄ պատժամիջոցները
Քաղաքականություն
30.05.2022 | 15:34
Մինչ Ուկրաինայում մոլեգնում է պատերազմը, Սերբիայի նախագահը հայտարարել է, որ կիրակի Ռուսաստանի նախագահ Վլադիմիր Պուտինի հետ հեռախոսազրույցում պայմանավորվել է ռուսական բնական գազի «չափազանց շահավետ» գործարքի շուրջ, գրում է VOA-ն:
Նախագահ Ալեքսանդր Վուչիչը հրաժարվել է միանշանակ դատապարտել Ռուսաստանի ներխուժումն Ուկրաինա, իսկ Սերբիան չի միացել Մոսկվայի դեմ արևմտյան պատժամիջոցներին։ Վուչիչն ասել է, որ ցանկանում է, որ Սերբիան միանա ԵՄ-ին, սակայն վերջին մի քանի տարիների ընթացքում ամրապնդել է կապերը երկարամյա դաշնակից Ռուսաստանի հետ։
Համաձայնագիրը, ամենայն հավանականությամբ, կստորագրվի հունիսի սկզբին՝ ՌԴ ԱԳ նախարար Սերգեյ Լավրովի Բելգրադ այցի ժամանակ, որը ռուս բարձրաստիճան պաշտոնյայի եզակի այցն է եվրոպական երկիր՝ փետրվարի 24-ին Ուկրաինա ՌԴ ներխուժումից ի վեր:
Վուչիչի խոսքով՝ ինքը Պուտինին ասել է, որ ցանկանում է, որ «հնարավորինս շուտ խաղաղություն հաստատվի»։
Սերբիան գրեթե ամբողջությամբ կախված է ռուսական գազից, իսկ նրա հիմնական էներգետիկ ընկերությունների վերահսկիչ փաթեթները պատկանում են ռուսական կառույցներին։
«Կարող եմ ասել, որ մենք պայմանավորվել ենք այն հիմնական տարրերի շուրջ, որոնք շատ ձեռնտու են Սերբիային։ Մենք պայմանավորվել ենք ստորագրել երեք տարվա պայմանագիր, և սա պայմանագրի առաջին տարրն է, որը շատ շահավետ է սերբական կողմի համար»,- լրագրողներին ասել է Վուչիչը։
Պարզ չէ, թե Սերբիան ինչպես կստանա ռուսական գազը, եթե ԵՄ-ն որոշի դադարեցնել ռուսական մատակարարումները, որոնք անցնում են ԵՄ անդամ երկրների տարածքով։ Ռուսաստանն արդեն դադարեցրել է գազի արտահանումը ԵՄ անդամ Ֆինլանդիա, Լեհաստան և Բուլղարիա։
Ուկրաինա Ռուսաստանի ներխուժումից հետո ԵՄ-ն հապճեպ փորձում է նվազեցնել կախվածությունը ռուսական էներգակիրներից, պատրաստվում է քննարկել այս ուղղությամբ հետագա քայլերն ու լսել Ուկրաինայի նախագահ Վլադիմիր Զելենսկու ելույթը այսօր մեկնարկող ԵՄ երկրների առաջնորդների գագաթնաժողովում:
Չնայած Ուկրաինայում վայրագությունների մասին հաղորդագրություններին՝ Վուչիչը և սերբ այլ պաշտոնյաներ բողոքել են Արևմուտքի ճնշումներից՝ միանալու Ռուսաստանի դեմ պատժամիջոցներին: Սերբ պաշտոնյաներն ասում են, որ երկիրը պետք է դիմադրի նման ճնշմանը, նույնիսկ եթե դա նշանակում է հրաժարվել ԵՄ-ին միանալու՝ Բելգրադի նպատակից:
Տաթև Ֆռանգյան
