Քաղաքականություն
30.05.2022 | 10:58
Ուկրաինայում Ռուսաստանի իշխանությունների իրականացրած «հատուկ գործողությունն» ընթանում է ըստ պլանի, դրա հիմնական խնդիրն է «Դոնեցկի և Լուգանսկի շրջանների ազատագրումը, որոնք այժմ Ռուսաստանի Դաշնության կողմից ճանաչված են որպես անկախ պետություններ»։ Այս մասին հայտարարել է ՌԴ արտգործնախարար Սերգեյ Լավրովը ֆրանսիական TF1 հեռուստաալիքին տված հարցազրույցում, փոխանցում է BBC-ի ռուսական ծառայությունը։
«Ինչ վերաբերում է Ուկրաինայի մնացած տարածքներին, որտեղ կան մարդիկ, որոնք չեն ցանկանում խզել կապերը Ռուսաստանի հետ, ապա այդ շրջանների բնակչությունը պետք է որոշի։ Դա ժողովրդի որոշելիքն է», – ասել է նա:
Նա կրկնել է այն թեզը, որ ռուսական ներխուժումն Ուկրաինա ձգձգվում է, քանի որ «բանակին հրամայվել է ամեն գնով խուսափել ցանկացած հարձակումից, ցանկացած հարվածից քաղաքացիական ենթակառուցվածքների վրա», թեև պատերազմի ընթացքում բազմաթիվ հաղորդումներ են եղել ռուսական զորքերի կողմից իրականացված գործողությունների արդյունքում քաղաքացիական անձանց մահվան մասին։
Լավրովն ուղիղ չի պատասխանել Ռուսաստանի և Ուկրաինայի միջև խաղաղ բանակցությունների վերսկսման հեռանկարի մասին հարցին։
«Մենք չենք ուզում ասել, որ այս կամ այն երկխոսության վերսկսման ճանապարհը կտրված է, բայց հիմա եվրոպական մտադրությունների մասին դատելու ենք միայն կոնկրետ գործողություններով»,- ասել է նա։
Տաթև Ֆռանգյան
