16.09.2026 | 20:06
Աշխատակիցներին սպառնում են աշխատանքից ազատել քաղաքական հայացքների պատճառով. «Անկախ դիտորդ»-ը ահազանգում է
Չավուշօղլուն հայտարարել է, որ Շվեդիայից և Ֆինլանդիայից սպասում են Թուրքիայի պահանջների կատարման կոնկրետ քայլերի
Քաղաքականություն
27.05.2022 | 19:11
ՆԱՏՕ-ի նոր ռազմավարական հայեցակարգը պետք է ենթադրի վճռական քայլեր ահաբեկչության ցանկացած դրսևորման դեմ։ Այս մասին հայտարարել է Թուրքիայի ԱԳ նախարար Մևլութ Չավուշօղլուն Ստամբուլում Ռումինիայի և Լեհաստանի ԱԳ նախարարների հետ եռակողմ հանդիպումից հետո, գրում է «Անադոլու»-ն։
Նրա խոսքով՝ արագ փոփոխվող աշխարհում ահաբեկչությունն «ամենալուրջ ասիմետրիկ սպառնալիքն է ՆԱՏՕ-ի և նրա դաշնակիցների համար», և այդ գործոնը պետք է հաշվի առնել։
«2022 թվականը միակն է ՆԱՏՕ-ի պատմության մեջ, երբ ռազմաքաղաքական դաշինքի միանգամից երեք գագաթնաժողովներ կանցկացվեն։ Նույնիսկ այս հանգամանքը ցույց է տալիս այն ժամանակաշրջանի ռազմավարական նշանակությունը, որում մենք գտնվում ենք»,- հայտարարել է թուրքական դիվանագիտության ղեկավարը։
Նա կրկին խոսել է ՆԱՏՕ-ին Շվեդիայի և Ֆինլանդիայի անդամակցության դիմումների հարցով Անկարայի դիրքորոշման մասին։
«Մենք շատ պարզ և հստակ արտահայտել ենք մեր դիրքորոշումն այս հարցում։ Սկանդինավյան երկու երկրներն էլ պետք է կոնկրետ քայլեր ձեռնարկեն ահաբեկչական կազմակերպությունների դեմ պայքարում»,- հայտարարել է Չավուշօղլուն։
Ըստ նրա՝ Թուրքիան Շվեդիայից և Ֆինլանդիայից ակնկալում է արձագանք ահաբեկիչների հետ համագործակցությունից հրաժարվելու Անկարայի պահանջներին։
«Սպասում ենք կոնկրետ քայլեր։ Հույսերը, թե ժամանակի ընթացքում Թուրքիայի դիրքորոշումը կփոխվի և նրան հնարավոր կլինի համոզել, զուր են»,- ասել է Չավուշօղլուն։
Նա նաև հույս է հայտնել, որ ՆԱՏՕ-ի մյուս երկրները քայլեր կձեռնարկեն, որոնք Ստոկհոլմին և Հելսինկիին կստիպեն գնալ Անկարայի անվտանգային մտահոգությունների լուծումների։
Էմմա Չոբանյան
