07.05.2024 | 15:38
Ամենայն Հայոց Կաթողիկոսը քաղաքական շարժում է առաջնորդում. Փաշինյան․ ՏԵՍԱՆՅՈՒԹ
Հայաստանի և Ուզբեկստանի գիտությունների ակադեմիաները գիտական համագործակցության մասին համաձայնագիր են ստորագրել
Հասարակություն
27.05.2022 | 16:15
Ս.թ. մայիսի 26-ին ՀՀ Գիտությունների ազգային ակադեմիայի նախագահ, ակադեմիկոս Աշոտ Սաղյանը և Ուզբեկստանի Հանրապետության Գիտությունների ակադեմիայի նախագահ, ակադեմիկոս Բեխզոդ Յուլդաշևը ստորագրեցին գիտական համագործակցության մասին համաձայնագիր. տեղեկացնում են ՀՀ ԳԱԱ-ից:
«Միջոցառումն անցկացվեց առցանց ձևաչափով: ՀՀ ԳԱԱ-ում միջոցառմանը մասնակցեցին նաև Ուզբեկստանի Հանրապետությունում ՀՀ արտակարգ և լիազոր դեսպան Արամ Գրիգորյանը, ՀՀ ԳԱԱ նախագահի տեղակալ Վարդան Սահակյանը, ՀՀ ԳԱԱ միջազգային բաժնի պետ Գագիկ Էվոյանը:
Համաձայնագիրը նախատեսում է երկու երկրների գիտական կազմակերպությունների միջև հարաբերությունների զարգացում, գիտատեխնիկական ներուժի ամրապնդում, տեղեկատվության և տեխնոլոգիաների փոխանակում, գիտական ենթակառուցվածքների համատեղ օգտագործում, համատեղ գիտական և գիտատեխնիկական նախագծերի մշակում և իրականացում, համատեղ հետազոտական և արտադրական կենտրոնների ստեղծում, ուսանողների և երիտասարդ գիտնականների վերապատրաստման կազմակերպում:
ՀՀ ԳԱԱ նախագահ, ակադեմիկոս Աշոտ Սաղյանը շեշտեց երկու երկրների գիտական կազմակերպությունների համագործակցության կարևորությունը: Ուզբեկստանի Հանրապետության Գիտությունների ակադեմիայի նախագահ, ակադեմիկոս Բեխզոդ Յուլդաշևը հրավիրեց Աշոտ Սաղյանին այցելելու Ուզբեկստանի Գիտությունների ակադեմիա՝ նշելով, որ Հայաստանի ֆիզիկոսների հետ համագործակցության իր նախկին փորձը եղել է դրական և արդյունավետ:
Ի պատասխան Աշոտ Սաղյանը հրավիրեց ակադեմիկոս Յուլդաշևին այցելելու Հայաստան: «Մենք ուրախ կլինենք ընդունելու Ուզբեկստանի մեր գործընկերներին՝ քննարկելու առաջիկա քայլերն արդյունավետ համագործակցության հասնելու համար», – ասաց ՀՀ ԳԱԱ նախագահը»,- ասված է հաղորդագրությունում:
