ԱՄՆ-ը բացառել է պատժամիջոցների չեղարկումը՝ ՌԴ-ի կողմից ուկրաինական ցորենի արտահանումները թույլ տալու դիմաց

ԱՄՆ-ը բացառում է Ռուսաստանի դեմ պատժամիջոցների մի մասը չեղարկելու հնարավորությունը՝ հացահատիկի արտահանման համար ուկրաինական նավահանգիստներն ապաշրջափակելու դիմաց, ինչպես պահանջում է Մոսկվան,  հայտարարել է Սպիտակ տան մամուլի քարտուղար Կարին Ժան Պիերը, գրում է DW-ի ռուսական ծառայությունը։

«Հենց Ռուսաստանն է արգելափակում  հացահատիկի արտահանումն ուկրաինական նավահանգիստներից և սով է հրահրում աշխարհում: Տոննաներով պարենամթերք կա նավերի վրա, որոնք չեն կարողանում նավարկել ռուսական շրջափակման պատճառով։ ԱՄՆ-ի և գործընկերների պատժամիջոցները չեն արգելում ուկրաինական կամ ռուսական ագրոարդյունաբերական արտադրանքի արտահանումը, ինչպես նաև չեն արգելում բանկային փոխանցումները կամ նավերը, որոնք անհրաժեշտ են այդ արտահանման համար: Ռուսաստանը պետք է անհապաղ թույլ տա ուկրաինական արտահանումը»,- հայտարարել է նա։

Պատժամիջոցների վերացման մասին ոչ մի քննարկում չկա, ընդգծել է Ժան Պիերը:

Հիշեցնենք՝ ՌԴ նախագահ Վլադիմիր Պուտինն Իտալիայի վարչապետ Մարիո Դրագիի հետ զրույցում ասել էր, որ Ռուսաստանը պատրաստ է «զգալի ներդրում ունենալ պարենային ճգնաժամի հաղթահարման գործում՝ հացահատիկի և պարարտանյութերի արտահանման միջոցով», եթե Արևմուտքը չեղարկի իր նկատմամբ պատժամիջոցները։ Կրեմլը չի հստակեցրել՝ խոսքը վերաբերում է հացահատիկի արտահանմանը Ռուսաստանի՞ց, թե՞ Ուկրաինայից։ Դրագին ասել է, որ խնդրել է Պուտինին ապաշրջափակել հացահատիկն ուկրաինական նավահանգիստներում:

Ներկայում Ուկրաինայի նավահանգիստներում արգելափակված է մինչև 4,5 մլն տոննա հացահատիկ, որը չի կարող մատակարարվել գնորդներին Մոսկվայի սանձազերծած պատերազմի պատճառով։ Արևմուտքը Ռուսաստանին մեղադրում է մատակարարումները կանխամտածված արգելափակելու մեջ։ Կրեմլը հերքում է այս մեղադրանքները։

Տաթև Ֆռանգյան