Էրդողանը չի ցանկանում բաց թողնել Սիրիայի վրա նոր հարձակման հնարավորությունը․ Թուրքիայի նախկին ԱԳ նախարար

Թուրքիայի իշխող «Արդարություն և զարգացում» կուսակցության (ԱԶԿ) 20-ամյա իշխանության առաջին ԱԳ նախարար Յաշար Յաքըշը գնահատել է երկրի  նախագահ և ԱԶԿ ղեկավար Ռեջեփ Թայիփ Էրդողանի հայտարարությունները Սիրիայի հյուսիսում նոր ռազմական հարձակման մասին, գրում է Bianet-ը։

Հիշեցնենք, որ երկուշաբթի Էրդողանը հայտարարել էր, որ հնարավոր է՝ շուտով նոր ռազմական գործողություն սկսեն Սիրիայի հյուսիսում՝ սահմանագծի երկայնքով «անվտանգության գոտի» ստեղծելու համար։

Յաքըշի կարծիքով՝ Անկարան դեռ կարող է հավանություն չստանալ ո՛չ ՌԴ-ի, ո՛չ էլ ԱՄՆ-ի կողմից հնարավոր գործողության համար։

«Սակայն ԱՄՆ-ի և Թուրքիայի միջև բանակցություններ կարող են լինել, քանի որ Թուրքիան այժմ ՆԱՏՕ-ի քարտ ունի՝ կապված Ֆինլանդիայի և Շվեդիայի անդամակցության հետ։ Թուրքիայի համար հիմա երկու հնարավորություն կա․ առաջինը՝ Ռուսաստանը զբաղված է Ուկրաինայում պատերազմով, երկրորդ՝ Թուրքիան ունի ՆԱՏՕ-ի քարտ։ Կա ԱՄՆ-ի հետ բանակցությունների հնարավորություն։ Թուրքիան այդ հնարավորությունը բաց չի թողնի»,- ասել է Թուրքիայի նախկին ԱԳ նախարարը։

Նա նշել է, որ այս հնարավոր գործողությունը կարող է նախապատրաստություն լինել նաև Թուրքիայում կայանալիք ընտրությունների համար։

«Եթե Թուրքիայի զինված ուժերը հաջողության հասնեն պատերազմում, ԱԶԿ-ն դա կօգտագործի որպես ձայներ հավաքելու հնարավորություն»,- ասել է Յաքըշը։

Ըստ նախկին դիվանագետի՝ Թուրքիայի անդրսահմանային գործողությունները Սիրիայում ի սկզբանե սխալ որոշում էին։

«Թուրքիան ցանկանում էր օգտագործել Ժողովրդական պաշտպանության ստորաբաժանումները (YPG) Ասադի ռեժիմի դեմ, սակայն YPG-ն մերժեց դա: Դրանից հետո Թուրքիան սկսեց թիրախավորել YPG-ին»,- հայտարարել է նա։

Թուրքիայի զինված ուժերը 4 խոշոր հարձակում են իրականացրել Սիրիայի հյուսիսում՝ «Եփրատի վահան» օպերացիան՝ 2016 թվականին, «Ձիթենու ճյուղ» օպերացիան՝ 2018-ին, «Խաղաղության աղբյուր» օպերացիան՝ 2019-ին և «Գարնանային վահան» օպերացիան՝ 2020-ին։

Ըստ Յաքըշի՝ հինգերորդ գործողությունը կարող է նաև լարվածություն առաջացնել Իրանի հետ հարաբերություններում։

«Ի սկզբանե Ռուսաստանն ու Իրանը Սիրիա են գնացել սիրիական կառավարության պաշտոնական հրավերով: Այսպիսով, նրանք օրինական ներկայություն ունեն այնտեղ: Մյուս կողմից, Թուրքիան և ԱՄՆ-ը գնացել են Սիրիա՝ առանց սիրիական կառավարության համաձայնության: Սա ևս պետք է հաշվի առնել»,- ասել է նա։

Էմմա Չոբանյան