16.09.2026 | 20:06
Աշխատակիցներին սպառնում են աշխատանքից ազատել քաղաքական հայացքների պատճառով. «Անկախ դիտորդ»-ը ահազանգում է
Էրդողանի հայտարարությունից հետո ԱՄՆ-ը Թուրքիայի հետ քննարկել է Սիրիայում հնարավոր էսկալացիան
Քաղաքականություն
26.05.2022 | 14:40
Վաշինգտոնն Անկարայի հետ քննարկել է Սիրիայում Թուրքիայի և քուրդ զինյալների միջև իրավիճակի սրման հնարավորության հարցը։ Այս մասին ճեպազրույցում հայտարարել է ԱՄՆ Պետքարտուղարության խոսնակ Նեդ Փրայսը, գրում է rudaw.net-ը։
Հիշեցնենք՝ Թուրքիայի նախագահ Ռեջեփ Թայիփ Էրդողանը հայտարարել է, որ Անկարան նոր գործողություն է նախապատրաստում Սիրիայի հյուսիսում քրդերի դեմ։
Rudaw-ի թղթակիցը Նեդ Փրայսին հարցրել է նոր բախումների հնարավորության մասին։
«Մենք կապի մեջ ենք մեր թուրք դաշնակիցների հետ այդ հարցով՝ ավելին իմանալու այն մասին, ինչն առաջին անգամ հնչեցրել է նախագահ Էրդողանը վերջին օրերին: Մենք դա արել ենք մեր դեսապանատան, նաև Պետքարտուղարության միջոցով»,- ասել է Փրայսը։
Ավելի վաղ Պետքարտուղարության խոսնակն ասել էր, որ ԱՄՆ-ը «խորապես անհանգստացած է Սիրիայի հյուսիսում հնարավոր ռազմական ակտիվության աճի մասին զեկույցներով և քննարկումներով, մասնավորապես, տեղի խաղաղ բնակչության վրա դրա ազդեցությամբ»:
Նա նաև նշել էր, որ ԱՄՆ-ն ակնկալում է Թուրքիայի կողմից 2019 թվականի համաձայնագրի դրույթների հարգում՝ հավելելով, որ հրադադարի պահպանումը կարևոր է Սիրիայի կայունության ամրապնդման համար։
Էմմա Չոբանյան
