ԵՏՄ երկրներն ինտեգրման հսկայական ներուժ ունեն․ Ղրղզստանի վարչապետ

Եվրասիական տնտեսական միության (ԵՏՄ) երկրներն ունեն հետագա ինտեգրման հսկայական ներուժ։ Այս մասին այսօր Բիշքեկում առաջին Եվրասիական տնտեսական համաժողովի բացման ժամանակ ասել է Ղրղզստանի վարչապետ Ակըլբեկ Ժապարովը, ՌԻԱ Նովոստին։

«Անդամ երկրների համար միության փոխշահավետությունն ակնհայտ է։ Մենք ունենք հետագա ինտեգրման հսկայական ներուժ։ Դաշնակցային ծրագրերն ինտեգրման հիմնական գործիքներից են։ Նրանք արդյունավետորեն զարգացնում են ինտեգրումը, ինչը հնարավորություն է տալիս մեծացնել արտադրական հզորությունները, կազմակերպել լրացուցիչ աշխատատեղեր, ինչպես նաև ավելացնել արտահանման մատակարարումներն աշխարհի շատ երկրներ»,- ասել է Ժապարովը։

«Քաղաքակրթական տեղաշարժ կա Արևմուտքից դեպի Արևելք: Տնտեսական ծանրության կենտրոնը տեղափոխվում է Ասիա մայրցամաք: Եթե պատուհանը դեպի Եվրոպա փակվում է, բացվում է պատուհանը դեպի Ասիա: Մենք ականատես ենք դառնում աննախադեպ փոփոխությունների, որտեղ մեր միությունը պետք է զբաղեցնի իր գերիշխող դիրքը»,- ընդգծել է նա։

Ղրղզստանի կառավարության ղեկավարը նշել է, որ ԵՏՄ-ն լայն հեռանկարներ է բացում իր անդամ երկրների տնտեսական զարգացման համար, ստեղծում է լրացուցիչ մրցակցային առավելություններ առևտրատնտեսական համագործակցության զարգացման և ամրապնդման գործընթացում։

«Վստահ եմ, որ գիտական, տեխնիկական, արդյունաբերական բազան, բարձր կրթված և որակյալ մարդկային ռեսուրսները բավարար են այս միության անդամներին ինքնաբավ դարձնելու համար, որն է՛լ ավելի կապահովի մեր երեխաների և ապագա սերունդների բարգավաճ ու կայուն, լուսավոր ապագան։ ԵՏՄ-ն ընդլայնմամբ ի վիճակի է վերածվել համաշխարհային տնտեսության հիմնական սուբյեկտի և օգնել վերացնել այն աղավաղումները և անհավասարակշռությունները, որոնք ձևավորվել են վերջին տասնամյակների ընթացքում համաշխարհային տնտեսական հարաբերություններում»,- ասել է պաշտոնյան։

Ժապարովն արդյունավետ աշխատանք է մաղթել ֆորումի մասնակիցներին և վստահություն հայտնել, որ պանելային քննարկումների ընթացքում անդրադարձ կլինի ԵՏՄ հետագա զարգացման վրա ազդող կարևորագույն հարցերի՝ համաշխարհային տնտեսության գլոբալ տուրբուլենտության դարաշրջանում։

Տաթև Ֆռանգյան