Քաղաքականություն
26.05.2022 | 11:45
Եվրամիությունը, Միացյալ Նահանգները և Մեծ Բրիտանիան հայտարարել են վայրագությունների հետ կապված հանցագործությունների դեմ խորհրդատվական խմբի (ACA) ձևավորման մասին, որը կհամակարգի ջանքերը՝ պատասխանատվության ենթարկելու Ռուսաստանի կողմից Ուկրաինայի դեմ պատերազմի ժամանակ կատարված հանցագործությունների համար, գրում է BBC -ի ռուսական ծառայությունը:
ACA-ի հիմնական առաքելությունն է լինելու աջակցել Ուկրաինայի գլխավոր դատախազության աշխատանքին Ուկրաինայում ռուսական զորքերի կողմից կատարված հանցագործությունների փաստագրման, պահպանման և վերլուծության գործում՝ նրանց պատասխանատվության ենթարկելու համար:
Խորհրդատվական խմբի քրեական փորձագետների մեծ մասը լինելու է Լեհաստանում՝ անվտանգության նկատառումներից ելնելով։
«Շատ կարևոր է ապահովել, որ բոլոր նրանք, ովքեր պատասխանատու են Ռուսաստանի կողմից Ուկրաինայում չհրահրված ռազմական ագրեսիայի ժամանակ կատարված սարսափելի վայրագությունների համար, պատասխանատվության ենթարկվեն: Պատերազմական հանցագործությունները չեն կարող անպատիժ մնալ», – ասել է ԵՄ դիվանագետ Ժոզեպ Բորելը:
2022 թվականի մայիսի 23-ին Կիևի Սոլոմենսկի դատարանը ցմահ ազատազրկման է դատապարտել Սումիի մարզում քաղաքացիական անձի սպանության մեջ մեղադրվող գերի սերժանտ Վադիմ Շիշիմարինին։
Նա առաջին ռուս զինվորն է, որը հայտնվել է ուկրաինական դատարանի առաջ՝ ներխուժման սկսվելուց ի վեր։
Տաթև Ֆռանգյան
