16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ռուսաստանը և Իրանը պայմանավորվել են հնարավորինս անցնել ազգային արժույթներով առևտրի
Քաղաքականություն
25.05.2022 | 20:31
Ռուսաստանն ու Իրանը կշարունակեն ավելացնել ազգային արժույթների մասնաբաժինը արտաքին առևտրում, Թեհրանում լրագրողների հետ զրույցում հայտնել է ՌԴ փոխվարչապետ Ալեքսանդր Նովակը ՝ երկկողմ միջկառավարական հանձնաժողովի նիստի համանախագահների հանդիպման արդյունքներով, փոխանցում է Ինտերֆաքսը։
«Քննարկման առանցքային թեմաներից մեկը ֆինանսաբանկային ոլորտն էր. փոխադարձ հաշվարկների և իրավաբանական անձանց և կազմակերպությունների միջև վճարումների պայմանները: Մենք պայմանավորվեցինք հնարավորինս անցնել ազգային արժույթների օգտագործմանը»,- ասել է Նովակը:
Նրա խոսքով՝ օրակարգում է եղել նաև Ռուսաստանի Բանկի ֆինանսական հաղորդագրությունների փոխանցման համակարգին (СПФС) միացումը, «Միր» և «Շետաբ» վճարային համակարգերի հնարավորությունների օգտագործումը։
«Մոտ ժամանակներս սպասում ենք Իրանի Կենտրոնական բանկի և ֆինանսների նախարարության պատվիրակություններին՝ Մոսկվայում վերջնական որոշումները մշակելու համար»,- ասել է Նովակը։
Բացի այդ, միջկառավարական հանձնաժողովի համանախագահները քննարկել են Իրանի խնդրանքը՝ հացահատիկային ապրանքների, ցորենի և եգիպտացորենի մատակարարման վերաբերյալ։
«Ամենակարևոր ուղղությունը բանկային համագործակցությունն է, մենք խոսում ենք ազգային արժույթների օգտագործման մասին, և այդ հարցերի շուրջ լավ որոշումներ են ընդունվել», – հավելել է հանձնաժողովի իրանական կողմի համանախագահ, նավթի նախարար Ջավադ Ուջին։
Քննարկվել է նաև Ռուսաստանի կողմից Իրանին տրվող միջպետական վարկային գծի մնացած մասի հատկացման հարցը, որն, ընդհանուր առմամբ, կազմում է 5 միլիարդ դոլար։
Տաթև Ֆռանգյան
