Վանաձորում Աղայան փողոցը շարունակում է փակված մնալ, իսկ շինարարության ավարտը՝ օդում կախված

Վանաձորցիներն մի քանի օր առաջ փակել էին քաղաքի գլխավոր ճանապարհներից մեկը՝ Աղայան փողոցը։ Խնդիրը ճանապարհի մոտ 1 կիլոմետր երկարությամբ հարտվածն է, որի շինարարական աշխատանքներն արդեն շուրջ կես տարի է չեն ավարտվում։

Ճանապարհի ասֆալտե ծածկույթը քանդվել էր 2021 թվականի վերջին՝ հիմնանորոգելու նպատակով։ Դեկտեմբերի 5-ի ընտրությունները, ինչպես հայտնի է, չլուծեցին Վանաձորի համայնքապետի հարցը։ Վարչական դատարանը արգելանք է սահմանել, որով Վանաձորի ավագանին իրավունք չունի համայնքի ղեկավարի ընտրության օրակարգով նիստ գումարել, քանի դեռ «Լուսավոր Հայաստանը» դատարաններում վիճարկում է ընտրությունների արդյունքները։ Այս ամիսներին որևէ դատական նիստ չի եղել։ Վարչական դատարանն արգելանքի հարցը քննելու մասին հաջորդ նիստը նշանակել է հուլիսի 20-ին։ Այսպիսով՝ համայնքը չունի ոչ համայնքապետ, ոչ էլ 2022 թվականի համար հաստատված բյուջե։

Վանաձորի համայնքապետարանի հանրային կապերի բաժնի պետ Էդիկ Հովսեփյանը Factor.am-ի հետ զրույցում հաստատեց, որ ճանապարհը շարունակվում է փակ մնալ։ «Շինարարական տեխնիկայի պատճառով ճանապարհը շարունակում է փակ մնալ։ Մինչ դա էլ՝ բնակիչներն էին փակել։ Խնդիրն այն է, որ ավագանի ունենք, բայց նիստ չի արել։ Մենք նախորդ տարվա բյուջետային մասով կարող ենք ֆինանսավորել շինարարական աշխատանքները։ Այսինքն՝ շինարարին մենք կարող ենք ֆինանսավորել օգոստոս ամսին։ Հիմա շինարարների հետ բանակցություններ են գնում, որ շինարարությունը անեն, մենք օգոստոս ամսին վճարենք։ Փողը կա, չենք կարողանում վճարենք։ Տեխնիկան այնտեղ կանգնած է հիմա»,- նշեց Հովսեփյանը։

Հարցին՝ արդյո՞ք շինարարական աշխատանքներն իրականացնող ընկերության կողմից որևէ դիտավորություն կարող է լինել շինաշխատանքների դադարեցման հարցում, Հովսեփյանը բացառեց․ «Բացարձակ։ Այդ ընկերությունը ամբողջ հանրապետությունով մեկ 2018-ից մոտ 30 մլրդ դրամի շինարարություն է անում, և մեր այս շինարարությունը այդտեղ փոքր մաս է։ Շատ մեծ կազմակերպություն է, աշխատանքներ է կատարում Հայաստանի տարբեր մարզերում։ Մեր Վանաձորի խնդիրն իրենց համար շատ փոքր է, պարզապես մենք չենք կարողանում այս պահին վճարել իր կատարած աշխատանքի համար, խնդրում ենք, որ աշխատանքը իր հաշվին կատարի, մինչև կարողանանք օգոստոսին վճարենք։ Տեխնիկական հարց է, ոչ մի քաղաքական ենթատեքստ ես չեմ տեսնում»,- նշեց Հովսեփյանը։

Անժելա Պողոսյան