14.09.2026 | 10:58
Բեռլինում նշվել է Հայաստանի անկախության 35-ամյակը․ ընդգծվել է ՀՀ–Գերմանիա ռազմավարական գործընկերության խորացումը
Անկարան ՆԱՏՕ-ից դուրս գալու հարց պետք է բարձրացնի, եթե Թուրքիայի պահանջները չկատարվեն․ էրդողանի դաշնակից
Քաղաքականություն
24.05.2022 | 18:15
ՆԱՏՕ-ն պետք է կատարի Շվեդիայի և Ֆինլանդիայի՝ դաշինքին միանալու հետ կապված Թուրքիայի պահանջները, հակառակ դեպքում Անկարան կբարձրացնի կազմակերպությունից դուրս գալու հարցը։ Այս մասին հայտարարել է Թուրքիայի նախագահ Էրդողանի դաշնակից, «Ազգայնական շարժում» կուսակցությունից խորհրդարանի պատգամավոր Դևլեթ Բահչելին, գրում է ՌԻԱ Նովոստին։
Մեկնաբանելով ՆԱՏՕ-ին անդամակցելու շուրջ Ստոկհոլմի և Հելսինկիի դիմումների հետ կապված իրավիճակը՝ թուրք գործիչը պաշտպանել է Անկարայի պաշտոնական դիրքորոշումը, որը մի շարք պահանջներ է առաջադրում Սկանդինավյան երկրների հայտերի հաստատման համար։ Բահչելին պահանջել է կատարել այդ պայմանները՝ հայտարարելով, որ Թուրքիան տարբերակներ ունի, նա անօգնական չէ։
«Նույնիսկ ՆԱՏՕ-ից դուրս գալը պետք է օրակարգ մտնի՝ որպես այլընտրանքային տարբերակ, եթե հանգամանքները դառնան անլուծելի»,- ընդգծել է նա։
Քաղաքական գործիչը ՆԱՏՕ-ին մեղադրել է Թուրքիայի հանդեպ անհարգալից վերաբերմունքի համար և առաջարկել այլընտրանք ստեղծել Հյուսիսատլանտյան դաշինքին թյուրքական և իսլամական երկրների համար։
Բահչելին հայտարարել է, թե «Ստոկհոլմը ֆինանսավորում է ահաբեկչությունը Քուրդիստանի աշխատավորական կուսակցության (PKK) միջոցով և նրան ցուցաբերում ռազմական օգնություն»։ Բացի այդ, պատգամավորը Շվեդիային և Ֆինլանդիային մեղադրել է Թուրքիայի ներկայիս կառավարության ընդդիմությանը՝ իսլամական քարոզիչ Ֆեթուլլահ Գյուլենի FETO շարժմանը աջակցելու մեջ։
«Ինչպե՞ս կարող է Շվեդիան այժմ անդամակցել ՆԱՏՕ-ին, ինչպե՞ս է ազգն ընդունելու այս նվաստացումը»,- հայտարարել է Բահչելին։
Տաթև Ֆռանգյան
