«Նա այլևս մեզ հետ չէ, նա մեր դեմ է». Կրեմլը մեկնաբանել է ՄԱԿ-ում ռուս դիվանագետի հրաժարականը

Ժնևում ՄԱԿ-ի ռուս դիվանագետ Բորիս Բոնդարևը, որը նախօրեին հրաժարական է տվել և նամակ ուղարկել իր օտարերկրյա գործընկերներին Ուկրաինայում Ռուսաստանի կողմից սանձազերծված պատերազմի հետ իր անհամաձայնության մասին, «հակառակվել է ռուս հասարակության համախմբված կարծիքին»։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, փոխանցում է BBC-ի ռուսական ծառայությունը։

Իր արտասահմանցի գործընկերներին ուղղված նամակում Բոնդարևը գրել է, որ «երբեք այնքան չի ամաչել իր երկրի համար, որքան այս տարվա փետրվարի 24-ին»։ Նա Ուկրաինայի դեմ Ռուսաստանի սանձազերծած պատերազմն անվանել է «ոչ միայն հանցագործություն ուկրաինացի ժողովրդի դեմ, այլ, հավանաբար, ամենալուրջ հանցագործությունը Ռուսաստանի ժողովրդի դեմ»։

Պեսկովն ասել է, որ Կրեմլը ծանոթ չէ այդ նամակին, և այդ մասին հարցեր է ուղարկել ՌԴ ԱԳՆ-ին։

«Այստեղ, հավանաբար, կարող ենք միայն ասել, որ պարոն Բոնդարևն այլևս մեզ հետ չէ, ավելի շուտ՝ նա մեր դեմ է»,- հայտարարել է Պեսկովը։

Լրագրողների հստակեցնող հարցին՝ ի՞նչ է նշանակում «մեր դեմ», Կրեմլի խոսնակը պատասխանել է․ «Նա դատապարտում է Ռուսաստանի ղեկավարության գործողությունները, իսկ Ռուսաստանի ղեկավարության գործողություններին աջակցում է մեր երկրի գրեթե ողջ բնակչությունը։ Սա նշանակում է, որ այդ պարոնը դեմ է եղել մեր երկրի ընդհանուր համախմբված կարծիքին»։

Տաթև Ֆռանգյան