Էրդողանը հայտարարել է, որ Հունաստանի վարչապետն իր համար «այլևս գոյություն չունի»՝ ԱՄՆ Կոնգրեսում ելույթից հետո

Թուրքիայի նախագահ Ռեջեփ Թայիփ Էրդողանը հայտարարել է, որ Հունաստանի վարչապետ Կիրիակոս Միցոտակիսն իր համար «այլևս գոյություն չունի», և նրան մեղադրել ԱՄՆ կատարած այցի ժամանակ Թուրքիային F-16 կործանիչների վաճառքն արգելափակելու փորձի մեջ, գրում են թուրքական լրատվամիջոցները։

«Մենք պայմանավորել էինք երրորդ երկրներին չներառել մեր վեճում։ Չնայած դրան՝ անցյալ շաբաթ նա այցելել է ԱՄՆ, խոսել Կոնգրեսում և զգուշացրել մեզ F-16-եր չտալ։ Նա ինձ համար այլևս գոյություն չունի։ Ես երբեք չեմ համաձայնի հանդիպել նրա հետ։ Մենք կշարունակենք մեր ճանապարհը հարգարժան քաղաքական գործիչների հետ»,- ասել է Էրդողանը կառավարության նիստին հաջորդած մամուլի ասուլիսում։

Հիշեցնենք, որ նախորդ շաբաթ Հունաստան կատարած այցի ժամանակ Միցոտակիսը հանդիպել է ԱՄՆ նախագահ Ջո Բայդենին ու բարձրաստիճան այլ պաշտոնյաների՝ նշելով, որ Աթենքը կսկսի ԱՄՆ-ից F-35 կործանիչներ գնելու ընթացակարգերը մինչև 2030 թվականը: Կոնգրեսում ունեցած ելույթում Հունաստանի վարչապետը նաև կոչ է արել Թուրքիային F-16 կործանիչներ չվաճառել։

Էրդողանը նաև ասել է, որ թեև ժամանակին Թուրքիան աջակցել է Հունաստանին՝ ՆԱՏՕ-ին միանալու հարցում, սակայն այս պահին դա Թուրքիայի համար ոչ մի օգուտ չունի։

«FETÖ-ի երթուղին դեպի Եվրոպա ներկայում Հունաստան չէ՞։ Հունաստանը չէ՞, որը կերակրում է ներսում գտնվող ահաբեկչական կազմակերպություններին»,- հայտարարել է Էրդողանը՝ նկատի ունենալով Ֆեթուլլահ Գյուլենի ցանցը, որին Անկարան անվանում է Գյուլենական ահաբեկչական կազմակերպություն (FETÖ):

Էրդողանի հայտարարություններից հետո Հունաստանի կառավարության խոսնակ Գիաննիս Օիկոնոմուն պատասխանել է, որ Միցոտակիսը պաշտպանում է Հունաստանի իրավունքները և միջազգային իրավունքը, և որ Աթենքի արտաքին քաղաքականությունը հիմնված է նաև իր դաշինքների վրա։

«Մենք հակավեճերի մեջ չենք մտնելու Թուրքիայի ղեկավարության հետ։ Մեր քաղաքականությունը սկզբունքների քաղաքականություն է»,- ասվում է հունական կողմի հայտարարության մեջ։

Էմմա Չոբանյան