Քաղաքականություն
24.05.2022 | 12:27
Գերմանիայի էկոնոմիկայի նախարար Ռոբերտ Հաբեկը հայտարարել է, որ ԵՄ-ն առաջիկա օրերին համաձայնության կգա ռուսական նավթի ներկրման արգելքի շուրջ։ Հաբեկն այս մասին ասել է ZDF հեռուստաընկերության եթերում, գրում է BBC-ի ռուսական ծառայությունը։
Եվրամիությունն արդեն մի քանի շաբաթ է՝ չի կարողանում համաձայնության գալ նավթային էմբարգոյի շուրջ։ Պատճառը ռուսական նավթի ներկրումից մեծապես կախված մի քանի երկրների դիմադրությունն է, առաջին հերթին՝ Հունգարիայի։ Reuters-ի հաղորդմամբ՝ Եվրահանձնաժողովը հույս ունի համոզել այդ երկրներին՝ առաջարկելով նրանց մեծ փոխհատուցում և ներդրումներ էներգետիկայի ոլորտում։
Ռոբերտ Հաբեկը հեռուստատեսային հարցազրույցում ասել է նաև, որ միայն նավթի էմբարգոն չի օգնի՝ Մոսկվային զրկել եկամուտներից, քանի որ արտահանման կորուստը կփոխհատուցվի նավթի բարձր գնով։ Ուստի, ըստ Հաբեկի, Եվրահանձնաժողովը և ԱՄՆ-ը համատեղ մշակում են նավթի սահմանային գների ներդրման ծրագիր։ Դրա համաձայն՝ բավական մեծ թվով երկրներ կհամաձայնվեն և կհրաժարվեն նավթի համար իրենց կողմից սահմանված շեմից բարձր գին վճարել։
«Սա, ակնհայտորեն, անսովոր որոշում է, սակայն մենք անսովոր ժամանակներում ենք ապրում»,- ասել է գերմանացի պաշտոնյան։
Տաթև Ֆռանգյան
