17.12.2025 | 23:55
ՊՍԺ-ն՝ Միջմայրցամաքային գավաթի հաղթող․ ՏԵՍԱՆՅՈՒԹ
Կապկի ծաղիկ. Մեծ Բրիտանիան խորհուրդ է տալիս 21-օրյա կարանտին
Քաղաքականություն
23.05.2022 | 15:03
Մեծ Բրիտանիայի առողջապահական մարմինները խորհուրդ են տալիս 21-օրյա կարանտին սահմանել կապկի ծաղիկով հիվանդ մարդկանց հետ սերտ շփումներ ունեցողների համար։ Այս մասին հայտնում է BBC-ն։
Նշվում է, որ դա վերաբերում է հիվանդների հետ անմիջական շփում ունեցող կամ նրանց հետ նույն տանն ապրող անձանց։ Նման մարդկանց խնդրում են հայտնել իրենց շփումների, վերջին ճանապարհորդությունների մասին և խուսափել շփումներից, հատկապես թույլ իմունային համակարգ ունեցող մարդկանց, հղի կանանց և փոքր երեխաների հետ:
Բրիտանիայում հայտնի է կապկի ծաղիկի 20 դեպք։ Ախտանիշները կարող են ներառել ջերմություն, մկանային ցավ և բնորոշ ցան: Հիվանդությունը սովորաբար թեթև է ընթանում, և հիվանդների մեծ մասն ապաքինվում է 2-4 շաբաթվա ընթացքում:
Ենթադրվում է, որ վարակվելու վտանգը եղել է այն մարդկանց մոտ, որոնք ունեցել են ֆիզիկական շփում, վարակված անձի հետ նույն ընտանիքում են ապրել կամ փոխել են հիվանդի անկողնային սպիտակեղենն առանց անձնական պաշտպանիչ սարքավորումների:
Ներկայում հայտնի է 14 երկրներում առնվազն 180 դեպքի մասին, որոնց մեծ մասը` Իսպանիայում և Պորտուգալիայում։ Երեք նմուշների գենետիկական վերլուծությունը ցույց է տալիս, որ այս վիրուսը շատ նման է 2018-19 թվականներին Նիգերիայում տարածված վիրուսին, գրում է The Guardian-ը։
Մեծ Բրիտանիայում նախկինում գրանցվել են վարակի մեկուսացված դեպքեր՝ 2018-2021 թվականների ընթացքում ընդամենը 7 դեպք, որոնք բոլորը կապված են եղել Նիգերիա կատարած ուղևորությունների հետ։
Հիշեցնենք, որ Եվրոպայում գրանցվել են նոր հիվանդության՝ կապկի ծաղիկով վարակման դեպքեր։ Առողջապահության համաշխարհային կազմակերպությունը հաղորդել է կապկի ծաղիկի հաստատված 92 դեպքի և 28 կասկածելի դեպքերի մասին 12 ոչ էնդեմիկ երկրներում:
Տաթև Ֆռանգյան
