26.11.2024 | 18:24
Հայաստանի խնդրանքով ԵՏՄ գագաթնաժողովը կանցկացվի Սանկտ Պետերբուրգում․ Ուշակով
Ուկրաինան հավակնում է անդամակցել ՆԱՏՕ-ին հակամարտության ավարտից անմիջապես հետո
Քաղաքականություն
20.05.2022 | 18:25
Գերմանիայում Ուկրաինայի դեսպան Անդրեյ Մելնիկը կարծում է, որ երկիրը կարող է դառնալ Հյուսիսատլանտյան դաշինքի անդամ իր տարածքում ռազմական գործողությունների ավարտից անմիջապես հետո։ Դիվանագետը նաև վստահություն է հայտնել, որ Շվեդիայի և Ֆինլանդիայի անդամակցությունը ՆԱՏՕ-ին չի հանգեցնի Ուկրաինայում իրավիճակի սրման, փոխանցում է ՏԱՍՍ-ը։
Ընթացիկ իրադարձությունները, դիվանագետի խոսքով, «ցույց են տալիս, որ ՆԱՏՕ-ն կա և կմնա անվտանգության միակ խարիսխը Եվրոպայում և ամբողջ աշխարհում»: «Հետևաբար, տրամաբանական է, որ այս ընդլայնման գործընթացը պետք է շարունակվի, և Ուկրաինան նույնպես պետք է միանա դաշինքին: Եվ ես կարծում եմ, որ դա կարող է տեղի ունենալ ավելի արագ, քան կարծում են ոմանք: Ոչ հիմա, պատերազմի թեժ փուլում, բայց հնարավոր է, անմիջապես հետո»,- հայտարարել է Ուկրաինայի դեսպանը։
Նրա կարծիքով՝ ՆԱՏՕ-ին անդամակցելու Ֆինլանդիայի և Շվեդիայի որոշումը զգալիորեն կբարձրացնի դաշինքի գրավչությունը և լավ նորություն է Կիևի համար։
«Մենք հուսով ենք, որ դա նաև կմեծացնի ՆԱՏՕ-ի անդամ դառնալու մեր հնարավորությունները որքան հնարավոր է շուտ»,- ասել է Մելնիկը։
Միաժամանակ նա վստահություն է հայտնել, որ մերձբալթյան երկրները և Լեհաստանը «երկու ձեռքով» կքվեարկեն Ուկրաինայի՝ Հյուսիսատլանտյան դաշինք մտնելու օգտին։
Հիշեցնենք, որ չորեքշաբթի օրը ՆԱՏՕ-ում Ֆինլանդիայի և Շվեդիայի դեսպանները դաշինքին անդամակցելու իրենց պետությունների դիմումները պաշտոնապես փոխանցեցին դաշինքի գլխավոր քարտուղար Յենս Ստոլտենբերգին։ Այս առիթով Ռուսաստանի նախագահ Վլադիմիր Պուտինը մայիսի 16-ին ՀԱՊԿ գագաթնաժողովի ժամանակ նախազգուշացրել է Մոսկվայի արձագանքի մասին։ Միևնույն ժամանակ, Ռուսաստանի ղեկավարը նշել է, որ Ֆինլանդիայի և Շվեդիայի հաշվին ՆԱՏՕ-ի ընդլայնումն ուղղակի վտանգ չի ներկայացնում Ռուսաստանի Դաշնության համար, քանի որ Մոսկվան այդ երկրների հետ խնդիրներ չունի։
Տաթև Ֆռանգյան
