16.09.2026 | 21:56
Հնդկաստանի նորանշանակ դեսպանը իր հավատարմագրերի պատճենն է հանձնել Հայաստանի ԱԳՄԱ նախարարի տեղակալին
Գերմանիայի կառավարությունը հաստատել է ՆԱՏՕ-ին անդամակցության Շվեդիայի և Ֆինլանդիայի հայտերը
Քաղաքականություն
18.05.2022 | 16:54
Գերմանիայի դաշնային կառավարությունը հաստատել է ՆԱՏՕ-ին անդամակցելու վերաբերյալ Շվեդիայի և Ֆինլանդիայի դիմումները դրանք ներկայացնելուց անմիջապես հետո։ Այս մասին գրում է DW-ի ռուսական ծառայությունը՝ հղում կատարելով dpa գործակալությանը։
Դաշինքին միանալու ներքին գործընթացի ավարտից հետո ՆԱՏՕ-ում Գերմանիայի դեսպան Ռյուդիգեր Քյոնիգը կկարողանա անմիջապես ստորագրել անդամակցության երկու արձանագրությունները։ Գործակալությունից հայտնել են, որ դաշնային նախագահ Ֆրանկ-Վալտեր Շտայնմայերն արդեն լիազորել է դրանք ստորագրելու իրավունքը։
Գերմանիայի ԱԳ նախարար Անալենա Բաերբոքը նույնպես խոսել է Շվեդիայի և Ֆինլանդիայի՝ ՆԱՏՕ-ին անդամակցելու շուրջ համաձայնության գալու «շատ արագ» գործընթացի մասին։ Դաշնային կառավարությունն արդեն համաձայնության է եկել Բունդեսթագի բոլոր դեմոկրատական կուսակցությունների հետ, նրա խոսքերն է մեջբերել dpa-ն։
Նոր անդամների ընդունումը պետք է միաձայն հաստատվի ՆԱՏՕ-ի անդամ բոլոր երկրների կողմից։ ՆԱՏՕ-ին Շվեդիայի և Ֆինլանդիայի անդամակցությանը կարող է խոչընդոտել դաշինքի անդամ Թուրքիայի դիրքորոշումը։ Նախագահ Ռեջեփ Թայիփ Էրդողանն այս շաբաթ վերահաստատեց Անկարայի առարկությունները։ Դա, ըստ նրա, պայմանավորված է Շվեդիայում և Ֆինլանդիայում քուրդ զինյալների հարցում հստակ դիրքորոշման բացակայությամբ, ինչպես նաև Թուրքիայի դեմ պատժամիջոցների կիրառմամբ։
Թուրքիան Շվեդիային և Ֆինլանդիային մեղադրում է քրդական զինված խմբավորումներին աջակցելու մեջ, որոնց Անկարան ահաբեկչական է համարում։ Բացի այդ, այս երկրները պատժամիջոցներ են սահմանել Թուրքիայի պաշտպանական արտադրանքի մատակարարման նկատմամբ՝ 2019 թվականին Սիրիայում քրդերի դեմ ռազմական գործողություն սկսելուց հետո։
Տաթև Ֆռանգյան
