Տեղական ընտրություններում Շոլցի կուսակցության պարտությունը լրատվամիջոցները կապել են Ուկրաինայի հետ

Կանցլեր Օլաֆ Շոլցի գլխավորած Սոցիալ-դեմոկրատական կուսակցությունը (ՍԴԿ) պարտվել է Հյուսիսային Ռեյն-Վեստֆալիա դաշնային երկրամասի ընտրություններում՝ ցույց տալով երբևէ վատթարագույն արդյունքը, մասամբ Ուկրաինայի հարցում իր քաղաքականության պատճառով։ Այս մասին գրում է ՌԻԱ Նովոստին՝ վկայակոչելով Die Welt պարբերականը։

Սեպտեմբերին դաշնային ընտրություններում հաղթելուց հետո կանցլեր Օլաֆ Շոլցի կողմից հռչակված «Սոցիալ-դեմոկրատական տասնամյակը» կրճատվել է մինչև մի քանի ամիս։ Հարցման տվյալները ցույց են տվել, որ ամենախիտ բնակեցված դաշնային նահանգում ընտրողների քվեարկության վրա առաջին հերթին ազդել են ներքաղաքական խնդիրները:

«Դեր է խաղում նաև Ուկրաինայի հարցում քաղաքականությունը»,- ընդգծում է պարբերականը։

Այսպիսով, Infratest dimap ինստիտուտի կողմից անցկացված հարցումը ցույց է տվել, որ շրջանի բնակիչների միայն 46%-ն է ճիշտ համարել Շոլցի վարած քաղաքականությունն Ուկրաինայի հարցում։

Հյուսիսային Ռեյն-Վեստֆալիայում կայացած տարածաշրջանային խորհրդարանի ընտրությունների արդյունքներով Քրիստոնեա-դեմոկրատական միությունը (ՔԴՄ) հաղթել է ձայների 35,7%-ով՝ բարելավելով իր ցուցանիշը 2,7%-ով։ Սոցիալ-դեմոկրատները հավաքել են ձայների 26,7 տոկոսը՝ նախորդ ընտրությունների համեմատ կորցնելով 4,5 տոկոս քվե։ Երրորդ տեղում Կանաչներն են, որոնք կարողացել են ստանալ ընտրողների 18,2%-ի աջակցությունը, իսկ կուսակցությունը բարելավե է իր արդյունքը 11,8%-ով։

Տաթև Ֆռանգյան