Ուկրաինան և Ռուսաստանը մարտնչում են Զմեինի կղզու համար

Սև ծովի Զմեինի կղզու մոտ շարունակվող մարտերի ընթացքում ուկրաինական զինուժի սպառազինության մեջ առկա «Բայրաքթար»-ները հարվածել են ռուսական հակաօդային պաշտպանության և մատակարարման նավերին՝ թույլ չտալով ՌԴ-ին ուժեղացնել իր կայազորը կղզում: Այս տեղեկությունը, որն ավելի վաղ հրապարակել էր Ուկրաինայի Զինված ուժերի գլխավոր շտաբը, մայիսի 11-ին հաստատել է Մեծ Բրիտանիայի Պաշտպանության նախարարությունը, գրում է DW-ի ռուսական ծառայությունը։

Ամփոփագրում ընդգծվում է, որ ռուսական հակաօդային պաշտպանության համակարգերը և մատակարարման նավերը վատ պաշտպանված են եղել Ղրիմի ռուսական նավատորմի նահանջից հետո՝ «Մոսկվա» հածանավի կորստի պատճառով։

Միաժամանակ․ Մեծ Բրիտանիայի ՊՆ-ն հայտնել է, որ եթե Ռուսաստանին հաջողվի ամրապնդել իր դիրքերը ռազմավարական թևավոր հրթիռների, հակաօդային պաշտպանության և առափնյա պաշտպանության օգնությամբ, ապա նա կարող է գերիշխել Սև ծովի հյուսիս-արևմտյան հատվածում։

Մայիսի 7-ին Ուկրաինայի Զինված ուժերի ցամաքային զորքերի «Հարավ» օպերատիվ հրամանատարությունը հայտնել է, որ «Բայրաքթար» անօդաչու թռչող սարքերը Զմեինի կղզու մոտ ոչնչացրել են երեք դեսանտային գրոհային նավ։ Երկու օր անց՝ մայիսի 9-ին, ՌԴ ՊՆ խոսնակ Իգոր Կոնաշենկովը հայտարարել է, որ մայիսի 7-ից ուկրաինական գլխավոր շտաբը «Զելենսկու անմիջական հրահանգով՝ ԱՄՆ-ի և Մեծ Բրիտանիայի խորհրդականների անմիջական մասնակցությամբ» նախատեսել է «խոշոր սադրանք»՝ կղզին գրավելու համար։ Նրա խոսքով՝ մարտերի ընթացքում Կիևը կորցրել է երեք ռմբակոծիչ, մեկ կործանիչ, 10 ուղղաթիռ, երեք գրոհային նավ և 30 անօդաչու թռչող սարք։

Մայիսի 11-ին ՌԴ Պաշտպանության նախարարությունը հայտարարեց Զմեինի կղզու մոտ հերթական անօդաչու թռչող սարքի ոչնչացման մասին։

Զմեինի կղզու տարածքում մարտերը շարունակվում են պատերազմի առաջին իսկ օրից։ Փետրվարի 24-ին ռուսական «Մոսկվա» հածանավը, որը մոտեցել է կղզուն, այնտեղ տեղակայված ուկրաինացի զինվորականներին առաջարկել է հանձնվել և ստացել անպարկեշտ պատասխան, որը լայնորեն մեջբերվում է սոցիալական ցանցերում։ Դրանից հետո հաղորդագրություն է հայտնվել, որ կղզու ուկրաինացի զինվորները գերի են ընկել։ Միաժամանակ, ՌԴ Պաշտպանության նախարարությունը հայտարարեց Զմեինի կղզին ռուսական զորքերի հսկողության տակ վերցնելու մասին։

Տաթև Ֆռանգյան