17.12.2025 | 16:33
Ադրբեջանում հայտնի ընդդիմադիր գործիչը կրկին կանչվել է Պետական անվտանգության ծառայություն
Էրդողանը հայտարարել է, թե Թուրքիան մտադիր չէ բռնի կերպով երկրից վտարել սիրիացի փախստականներին
Քաղաքականություն
09.05.2022 | 22:49
Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի պատրաստվում բռնի կերպով իր երկրում գտնվող սիրիացի փախստականներին վտարել, ինչում նրան մեղադրում են ընդդիմադիրները, գրում է ՏԱՍՍ-ը։
«Մենք որքան անհրաժեշտ է՝ կհյուրընկալենք մեր եղբայրներին, որոնք փախել են պատերազմից ու որոշել ապաստանել մեր երկրում։ Եթե նրանք ցանկանում են, կարող են վերադառնալ, բայց մենք նրանց ոչ մի դեպքում չենք վտարելու կամ արտաքսելու»,- ասել է Էրդողանը։
Նա նաև հայտնել է մինչև տարեվերջ սիրիական Իդլիբում առնվազն 100.000 տուն կառուցելու պլանների մասին։ Էրդողանը տեղեկացրել է, որ կառավարության առաջիկա նիստում կքննարկի մոտ մեկ միլիոն սիրիացի փախստականների հայրենիք վերադարձի նախագիծը, որոնց նախատեսվում է տեղավորել Անկարայի կողմից վերահսկվող անվտանգ գոտիներում։
Պաշտոնական տվյալներով՝ Թուրքիայում շուրջ 3,7 մլն սիրիացի փախստական է բնակվում։ Ընդդիմությունը, սակայն, պնդում է, որ իշխանությունները թաքցնում են նրանց իրական թիվը։ Իշխանությունները հերքում են այս մեղադրանքները՝ ասելով, որ ընդդիմության գործողություններն ուղղորդված են արտաքին ուժերի կողմից, որոնք ձգտում են ապակայունացնել Թուրքիայում իրավիճակը։ Թուրքիայում վերջին շրջանում սոցիալ-տնտեսական իրավիճակի վատթարացման ֆոնին հանրության շրջանում գերակշռում է բացասական վերաբերմունքը փախստականների նկատմամբ։
Էմմա Չոբանյան
