ԵՄ-ն առաջարկում է պատրիարք Կիրիլի նկատմամբ պատժամիջոցներ կիրառել

Եվրահանձնաժողովն (ԵՀ) առաջարկել է անձնական պատժամիջոցներ սահմանել Մոսկվայի և Համայն Ռուսիո պատրիարք Կիրիլի (Վլադիմիր Գյունյաև) դեմ։ Այս առաջարկը քննարկվել է մայիսի 4-ին ԵՀ նիստում, գրում է Reuters-ը՝ վկայակոչելով գերատեսչության ներկայացուցչին։

Աղբյուրի համաձայն՝ Ռուս ուղղափառ եկեղեցու պատրիարքն արդեն ընդգրկվել է Կրեմլի մերձավոր մարդկանց ցուցակի նախագծում, որոնք մեղադրվում են Ուկրաինայի դեմ Ռուսաստանի պատերազմին աջակցելու մեջ։ Եթե Կիրիլը ներառվի պատժամիջոցների մեկ այլ փաթեթում, որը ԵՄ դիվանագետները կքննարկեն այս շաբաթ, ապա Ռուս ուղղափառ եկեղեցու առաջնորդի ակտիվներն արտասահմանում կսառեցվեն, իսկ նրա մուտքը ԵՄ երկրներ կարգելվի։

Ավելի վաղ պատրիարք Կիրիլին քննադատել էր Հռոմի պապ Ֆրանցիսկոսը՝ նշելով, որ Ուկրաինայի դեմ Ռուսաստանի պատերազմի քննարկման ժամանակ «20 րոպե թղթից կարդացել է պատերազմի արդարացումները»։ Ի պատասխան՝ Կաթոլիկ եկեղեցու քահանայապետը նշել է, որ եկեղեցու սպասավորները պետք է հաղորդակցվեն «Հիսուսի լեզվով, ոչ թե քաղաքականության» և չեն կարող լինել քաղաքական գործիչների անձնական «զոհասեղանի սպասարկողներ»։

Իր հերթին, Ռուս ուղղափառ եկեղեցին ասել է, որ Ֆրանցիսկոս պապը «սխալ տոն է ընտրել այս զրույցի բովանդակությունը փոխանցելու համար», և նման հայտարարությունները «հազիվ թե նպաստեն Հռոմի կաթոլիկ և Ռուս ուղղափառ եկեղեցիների միջև կառուցողական երկխոսության հաստատմանը»:

Միևնույն ժամանակ, նա նշել է, որ պատրիարքը խոսել է 2014 թվականի Մայդանի մասին՝ որպես պատերազմին նախորդած իրադարձություններից մեկի, ինչպես նաև Ռուսաստանի հետ ՆԱՏՕ-ի պայմանավորվածությունների մասին, որոնց մասին ՌԴ նախագահ Վլադիմիր Պուտինը բազմիցս նշել է բացասական կերպով։

Տաթև Ֆռանգյան