Ալիևը կրկին հիշել է, այսպես կոչված, «Զանգեզուրի միջանցքի» մասին

Ադրբեջանի նախագահ Իլհամ Ալիևը կրկին խոսել է գոյություն չունեցող «Զանգեզուրի միջանցքի» մասին։ Ուշագրավ է, որ վերջին շրջանում օտարերկրյա տարբեր պաշտոնյաների հետ հանդիպումներում Ալիևը խոսում էր հաղորդակցման ուղու մասին, իսկ այժմ կրկին «միջանցքի» թեզն է մեջբերում։

Ադրբեջանական լրատվամիջոցների հաղորդմամբ՝ նա նշել է, որ «Զանգեզուրի միջանցքի» շրջանակում երկաթուղու ադրբեջանական հատվածի շինարարությունը կավարտվի 2023 թվականին։

««Զանգեզուրի միջանցքն» արդեն իրականություն է։ Ինչ վերաբերում է երկաթուղուն, ապա մեր կայարանն այդ ուղղությամբ, որը ներկա պահին վերջին ենթակառուցվածքն է, Հորադիզն է։ Երկաթուղու կառուցումը Հորադիզից Աղբենդ  արդեն ընթացքում է, և ես համոզված եմ, որ հաջորդ տարի այն արդեն կաշահագործվի»,- ասել է Ալիևը։

Նա նաև նշել է, որ արագացված տեմպերով իրականացվում է Հորադիզից Զանգիլան չորս և վեց գոտիներով ավտոճանապարհի շինարարությունը, որի փուլային շահագործումը կսկսվի 2023 թվականին։

Ալիևը նաև երևակայել է, որ Հայաստանի ինքնիշխան տարածքով անցնող ուղին, որն Ադրբեջանը կապելու է Նախիջևանի հետ, կդառնա միջազգային բեռնափոխադրումների նոր ճանապարհ։

««Զանգեզուրի միջանցքը» լրացուցիչ հնարավորություններ կստեղծի մեզ և հարևան երկրների համար։ Շուրջ 10-15 տարի է, ինչ մեծ նշանակություն ենք տալիս տրանսպորտի ոլորտին։ Այդ իսկ պատճառով մենք այսօր կարող ենք ընդունել ցանկացած բեռ և իրականացնել դրա տարանցումը։ Մենք դա անում ենք, և մեր հնարավորությունները կընդլայնվեն»,- հայտարարել է Ալիևը։

Հավելենք, որ Հայաստանը որևէ փաստաթուղթ չի ստորագրել որևէ պարտավորություն չունի երրորդ երկրի, այդ թվում՝ Ադրբեջանին որևէ միջանցք տրամադրել ՀՀ ինքնիշխան տարածքով։

Էմմա Չոբանյան