22.04.2026 | 16:00
ՀՀ դպրոցականները մեդալներ են նվաճել ինֆորմատիկայի միջազգային օլիմպիադայում
Մետրոյի Աջափնյակ կայարանի նախագծման համար կհատկացվի 750 մլն դրամ. գումարը քրգործով է հետ բերվել․ ՏԵՍԱՆՅՈՒԹ
Տնտեսություն
28.04.2022 | 12:42
Երևանի մետրոպոլիտենի Աջափնյակ կայարանը կառուցելու համար հայտարարված մրցույթում կա հաղթող: Կառավարության այսօրվա նիստում վարչապետ Նիկոլ Փաշինյանը նշեց, որ վաղուց քննարկվում է Երևանում Աջափնյակ կայարան կառուցելու հարցը և հնարավորությունը:
«Մենք սկսել ենք գործնական փուլը: Հայտարարվել էր մրցույթ՝ կայարանի նախագծման վերաբերյալ: Մրցույթի արդյունքներով կա հաղթող ու այսօր կքննարկեն ֆինանսավորման հարցը, որպեսզի նախագծողը արդեն կոնկրետ Աջափնյակ կայարանի նախագիծը պատրաստի, ինչը նշանակում է՝ մտնում ենք շինարարության փուլ»,- ասաց Փաշինյանը:
Նրա խոսքով` «Parking City Service» ընկերության կողմից Երևան համայնքին հասցված 850 մլն դրամի վնասի փոխհատուցման 750 մլն դրամը կուղղվի կայարանի նախագծման աշխատանքներին:
Երևանի քաղաքապետ Հրաչյա Սարգսյանն էլ արձագանքեց, որ նախագիծը կիրականացվի 510 օրում, կամ՝ գուցե ավելի շուտ, 50 միլիոն դոլարի շրջանակներում:
«Երեք փուլով է նախագիծը լինելու: Այս ֆինանսական միջոցների հաշվին կկարողանանք առաջին երկու փուլը ֆինանսավորել: Միաժամանակ, կխնդրեի ձեր հանձնարարականը, որպեսզի կարողանանք հիմիկվանից սկսած աշխատել նախագծի երրորդ փուլի համար ֆինանսական միջոցների հայթայթման մասով»,- ասաց Սարգսյանը:
Նիկոլ Փաշինյանը նշեց, թե այս ծրագիրը ռազմավարական ծրագիր է, որովհետև սա նշանակում է, որ մետրոն անցում է կատարում Հրազդան գետի հակառակ ափ, ինչը նշանակում է, որ հետագա ճյուղավորման հնարավորություն է ստեղծվում դեպի Դավթաշեն, Մալաթիա-Սեբաստիա, 15-րդ թաղամաս և այլն:
