06.11.2024 | 23:22
Ժոզեպ Բորելը շնորհավորել է Դոնալդ Թրամփին և հայտարարել ուժեղ Եվրոպա ստեղծելու մասին
Ղրղզստանը դժգոհում է, որ Թուրքիան «Բայրաքթար»-ներ է մատակարարել Տաջիկստանին
Քաղաքականություն
27.04.2022 | 17:05
Թուրքիան «Բայրաքթար» անօդաչու թռրող սարքեր է մատակարարել Տաջիկստանին։ Այս մասին Ղրղզստանի խորհրդարանում հայտարարել է երկրի ԱԳ նախարարի պաշտոնակատար Ժեենբեկ Կուլուբաևը, որի նշանակման թեկնածությունը քննարկում են պատգամավորները, գրում է Knews․kg-ն։
Պատասխանելով պատգամավորներից մեկ հարցին՝ նա հաստատել է, որ Տաջիկստանը Թուրքիայից անօդաչուներ է գնել։
«Այո՛, դա ճիշտ է։ Թուրքիան Տաջիկստանին «Բայրաքթար» է ուղարկել։ Ավելի վաղ մենք խնդրել էինք թուրքական կողմին զգույշ լինել այդ հարցում, քանի որ Ղրղզստանի և Տաջիկստանի խնդիրները դեռ լուծված չեն, խնդրել էինք հարևան երկրներին անօդաչուներ չվաճառել։ Նրանք պատասխանեցին, որ դա բիզնես է, ռազմատեխնիկական համագործակցության խթանման հարց։ Մենք բանակցություններ ենք անցկացնելու թուրքական կողմի հետ ամբողջական տեղեկատվությունը ստանալուց հետո»,- ասել է Կուլուբաևը։
Թուրքական մամուլում էլ նշվում է, որ Թուրքիան զինատեսակներ է մատակարարելու Տաջիկստանին։ Անկարայում կնքված համաձայնագրում չի նշվում Թուրքիայից Տաջիկստան արտահանվող ռազմական տեխնիկայի քանակությունը։ Դուշանբեում Թուրքիայի դեսպանատունն իր հերթին Թվիթերում հրապարակել է թուրքական «Բայքար» ընկերության ղեկավար Սելջուկ Բայրաքթարի և Տաջիկստանի ՊՆ ղեկավար Շերալի Միրզոյի լուսանկարը։
Ավելի վաղ «Բայրաքթար»-ներ էր ձեռք բերել նաև Ղրղզստանը։
Հավելենք, որ Տաջիկստանը պաշտպանության նախարարն օրերս Անկարայում էր, որտեղ հանդիպել էր իր թուրք գործընկեր Հուլուսի Աքարին։ Նրանք ստորագրել էին պաշտպանական համագործակցության շրջանակային համաձայնագիր։
Հիշեցնենք՝ Տաջիկստանն ու Ղրղզստանը Հայաստանի հետ միասին ՀԱՊԿ անդամ են։
Էմմա Չոբանյան
