08.06.2026 | 16:58
Շվեդիայի վարչապետը շնորհավորել է Նիկոլ Փաշինյանին ՔՊ-ի հաղթանակի առիթով
Լատվիայի և Էստոնիայի խորհրդարանները Ուկրաինայում Ռուսաստանի գործողություններն անվանել են «ցեղասպանություն»
Քաղաքականություն
21.04.2022 | 18:34
Լատվիայի ու Էստոնիայի խորհրդարանները Ռուսաստանի գործողություններն Ուկրաինայում որակել են որպես «ցեղասպանություն», գրում է BBC-ի ռուսական ծառայությունը։ Հաղորդագրությունները հրապարակվել են Էստոնիայի խորհրդարանի ու Լատվիայի Սեյմի պաշտոնական կայքերում։
Էստոնիայի խորհրդարանի հայտարարության մեջ նշվում է, որ Ռուսաստանը Բուչա, Բորոդյանկա, Գոստոմել, Իրպեն և Մարիուպոլ քաղաքներում, ինչպես նաև Ուկրաինայի շատ այլ բնակավայրերում ցեղասպանություն և զանգվածային վայրագություններ է իրականացրել խաղաղ բնակչության նկատմամբ։
Լատվիական Սեյմի հաղորդագրության մեջ էլ նշվում է, որ Ուկրաինայում ռուսական բանակի կողմից զանգվածային և դաժան հանցագործությունների իրականացման էական ապացույցներ կան։
«Լատվիան դատապարտում է մարդկության դեմ ուղղված բոլոր հանցագործությունները և ցեղասպանությունը, գիտակցում է իր պարտականությունը՝ ճանաչելու, կանխելու և հավերժացնելու այդ հանցագործությունների հիշատակը՝ դրանց կրկնությունը կանխելու համար»,-ասվում է հայտարարության մեջ։
Ավելի վաղ էլ ուկրաինական Ռադան էր Ռուսաստանի զինված ուժերի գործողությունները ճանաչել որպես «ուկրաինացի ժողովրդի ցեղասպանություն»։
ԱՄՆ նախագահ Ջո Բայդենը ևս ռուսական բանակի գործողությունները Ուկրաինայում անվանել էր «ցեղասպանություն»։
Էմմա Չոբանյան
