16.09.2026 | 18:46
ՀՀ-ն է որոշումներ կայացնելու TRIPP մուտք ու ելքի պահին. Փաշինյան. ՏԵՍԱՆՅՈՒԹ
Աշխարհն ականատես է լինում նոր սառը պատերազմի սկզբին․ Ուկրաինայի անվտանգությունն ապահովելու համար կարող են տասնամյակներ պահանջվել․ Չավուշօղլու
Քաղաքականություն
19.04.2022 | 19:47
Թուրքիան կարծում է, որ Ռուսաստանի Դաշնության և Ուկրաինայի միջև հակասությունների դիվանագիտական կարգավորման ուղիները չեն վերջացել։ Այս մասին երեքշաբթի օրը Անկարայում հունգարական դիվանագիտության ղեկավար Պետեր Սիյարթոյի հետ համատեղ մամուլի ասուլիսում հայտարարել է Թուրքիայի արտգործնախարար Մևլութ Չավուշօղլուն, գրում է Անադոլու գործակալությունը։
Թուրքական դիվանագիտության ղեկավարը նշել է, որ Ուկրաինայի իշխանությունների պահանջներից է երկրի անվտանգության երաշխավորումը։
Նրա խոսքով՝ Անկարան այս հարցում ակտիվ կապի մեջ է ինչպես Կիևի, այնպես էլ այլ երկրների հետ, որոնց ուկրաինական կողմը ցանկանում է տեսնել որպես իր անվտանգության երաշխավոր։
«Ուկրաինան ձգտում է անվտանգության երաշխիքներ ստանալ, ինչպես ՆԱՏՕ-ի կանոնադրության 5-րդ հոդվածն է սահմանում: Այս տարբերակի դեմ կարծիքներ են հնչում, իրավիճակից դուրս գալու այլընտրանքային ուղիներ են քննարկվում»,- ասել է թուրք նախարարը։
Չավուշօղլուն ընդգծել է, որ այսօր աշխարհն ականատես է լինում նոր սառը պատերազմի սկզբին։ «Ուկրաինայի անվտանգությունն ապահովելու համար կարող են տասնամյակներ պահանջվել, սակայն ակտիվ քայլեր են անհրաժեշտ։ Թուրքիան ձգտում է առաջնորդություն ստանձնել այս հարցում»,- ասել է Չավուշօղլուն։
Տաթև Ֆռանգյան
