16.12.2025 | 20:30
ՀԿԿ-ն պնդում է՝ փաստաբանը 2 միլիոն դրամ կաշառք է վերցրել, որ տա դատավորին,բայց դատավորը մեղադրյալ չէ. ՏԵՍԱՆՅՈՒԹ
Ուկրաինայի պատերազմը վատթարացրել է 1․7 միլիարդ մարդու վիճակը․ ՄԱԿ-ի գլխավոր քարտուղար
Քաղաքականություն
14.04.2022 | 21:27
Ուկրաինայի պատերազմն այս կամ այն չափով վատթարացրել է 1․7 միլիարդ մարդու վիճակը, որոնց մեկ երրորդն արդեն աղքատության շեմից ցածր է։ Այս մասին ՄԱԿ-ի գլխավոր քարտուղար Անտոնիո Գուտերեշը հայտարարել է Նյու Յորքում հրավիրված մամուլի ասուլիսում, ասվում է կազմակերպության կայքում հրապարակված հաղորդագրությունում։
Նրա խոսքով՝ պատերազմը խափանումներ է առաջացրել համաշխարհային պարենային, էներգետիկ և ֆինանսական համակարգերում, ինչն անխուսափելիորեն կհանգեցնի աղքատության և սովի աճին մոլորակի մի քանի շրջաններում։
ՄԱԿ-ի գլխավոր քարտուղարն ընդգծել է, որ Ուկրաինա Ռուսաստանի ներխուժումից հետո ամբողջ աշխարհի ուշադրությունը կենտրոնացել է պատերազմի սարսափելի հետևանքների վրա, իսկ այս հակամարտության գլոբալ ազդեցության թեման հետին պլան է մղվել։
«Մինչդեռ պատերազմը շարունակում է ամեն օր սրել եռաչափ ճգնաժամը՝ պարենային, էներգետիկ և ֆինանսական՝ հարվածելով աշխարհի ամենախոցելի մարդկանց, երկրներին և տնտեսություններին։ Այս ամենը տեղի է ունենում այն ժամանակ, երբ զարգացող երկրները բախվում են մի շարք այլ հիմնական մարտահրավերների, ներառյալ՝ COVID-19 համաճարակը, կլիմայի փոփոխության հետևանքները և աճող անհավասարության պայմաններում վերակառուցման համար անհրաժեշտ ռեսուրսների հասանելիության բացակայությունը»,- ասել է Գուտերեշը։
ՄԱԿ-ի ղեկավարը ուշադրություն է հրավիրել այն փաստի վրա, որ 36 պետություններ իրենց անհրաժեշտ ցորենի կեսից ավելին գնում են Ռուսաստանից և Ուկրաինայից։ Այս թիվը ներառում է աշխարհի ամենաաղքատ և խոցելի երկրներից մի քանիսը: Հացահատիկի գները բարձրանում էին նաև մինչ հակամարտությունը, սակայն պատերազմը շատ ավելի վատթարացրեց առանց այն էլ բարդ իրավիճակը։ Ցորենի և եգիպտացորենի ինքնարժեքը տարեսկզբից թանկացել է 30 տոկոսով։
Մյուս կողմից, հիշեցրել է Անտոնիո Գուտերեշը, Ռուսաստանն էներգետիկ ռեսուրսների ամենամեծ մատակարարն է։ Ուկրաինա Ռուսաստանի ներխուժումից հետո նավթի համաշխարհային գները, անցյալ տարվա համեմատ, աճել են ավելի քան 60%-ով։ Բնական գազի արժեքը վերջին ամիսներին աճել է 50%-ով։
«Մթերքի և էներգիայի գների աճի հետ մեկտեղ՝ սովի և թերսնման խնդիրը սրվում է հատկապես փոքր երեխաների շրջանում։ Գնաճը շարունակվում է, գնողունակությունը նվազում է, տնտեսական աճի հեռանկարները նվազում են, շատ զարգացող երկրներ խեղդվում են պարտքերի մեջ։ Մեր աշխարհը չի կարող դա իրեն թույլ տալ»,- ասել է գլխավոր քարտուղարը:
Գուտերեշը կոչ է արել ապահովել սննդի և էներգիայի կայուն հոսք բաց շուկաների միջոցով:
«Սա նշանակում է արտահանման բոլոր անհարկի սահմանափակումների վերացում. այժմ պրոտեկցիոնիզմի ժամանակը չէ: Սա նշանակում է ավելցուկները և պաշարներն ուղղել կարիքավորներին: Մենք պետք է վերահսկենք պարենային ապրանքների գները և նվազեցնենք պարենային շուկաներում անկայունությունը»,- ընդգծել է նա:
Տաթև Ֆռանգյան
