18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ֆինլանդիան առաջիկա շաբաթների ընթացքում կորոշի ՆԱՏՕ-ին միանալու հարցը
Քաղաքականություն
13.04.2022 | 18:34
Ֆինլանդիան առաջիկա շաբաթների ընթացքում կորոշի ՆԱՏՕ-ին միանալու անհրաժեշտության հարցը։ Այս մասին Ստոկհոլմ կատարած այցի ժամանակ հայտարարել է վարչապետ Սաննա Մարինը, գրում է Bloomberg-ը։
«ՆԱՏՕ-ի վերաբերյալ որոշում կկայացվի մի քանի շաբաթվա ընթացքում»,- ասել է նա։
Մարինը նշել է, որ անհրաժեշտություն չի տեսնում, որ Ֆինլանդիայի՝ ՆԱՏՕ-ին անդամակցելու վերաբերյալ որոշումը կայացվի Շվեդիայի հետ միաժամանակ, բայց կցանկանար, որ երկու երկրներն էլ «նույն ընտրությունը կատարեին»:
Իր հերթին, Շվեդիայի վարչապետ Մագդալենա Անդերսոնը չի հաստատել ԶԼՄ-ների տեղեկությունները, թե երկիրը կարող է անդամակցել ՆԱՏՕ-ին այս տարի։
Ավելի վաղ շվեդական SvD պարբերականը հայտնել էր, որ «վարչապետի նպատակն է, որ Շվեդիան այս տարվա հունիսին անդամակցի ՆԱՏՕ-ին»։
Մինչ այս, ՆԱՏՕ-ի գլխավոր քարտուղար Յենս Ստոլտենբերգն ընդգծել էր, որ Ֆինլանդիան և Շվեդիան կարող են հույս դնել ՆԱՏՕ-ին արագացված ընթացակարգով անդամակցելու վրա։ ՌԴ Դաշնային խորհուրդն էլ հայտարարել է, որ ՆԱՏՕ-ին Ֆինլանդիայի հնարավոր անդամակցությունը Հելսինկիին ռուսական պատասխան քայլերի թիրախ կդարձնի։
Տաթև Ֆռանգյան
