Կանխիկը՝ «խաղից դուրս». շրջանառվող նոր նախագծով շահումով խաղերից օգտվելը կբարդանա. ՏԵՍԱՆՅՈւԹ

Շահումով խաղերի սիրահարներին տհաճ անակնկալներ են սպասվում։ Շրջանառության մեջ է դրվել օրենքի նախագիծ, որով որոշակի սահմանափակումներ կմտցվեն այդ ոլորտում ֆինանսական հոսքերի հետ կապված։

Եթե շահումով խաղերի, ինտերնետ շահումով խաղերի և խաղատների մասին օրենքում և կից օրենքների փաթեթում առաջարկվող հիմնական փոփոխությունն ընդունվի, բուքմեյքերական հաշիվն այլևս հնարավոր չի լինի լիցքավորել կանխիկ գումարով, իսկ էլեկտրոնային դրամապանակից լիցքավորման արգելքը կսկսի գործել օրենքն ուժի մեջ մտնելուց 6 ամիս հետո։

Նախագծի հեղինակները ԱԺ «Քաղաքացիական պայմանագիր» խմբակցության պատգամավորներ Ծովինար Վարդանյանն ու Գևորգ Պապոյանն են։

Հասարակության մի զգալի հատված օգտվում է շահումով խաղերից, որոնց մեջ մեծ չափաբաժին ունեն համացանցի միջոցով իրականացվող շահումով խաղերը: Այս խաղերի տարածման հետևանքով սոցիալական խնդիրներն ավելի են սրվում:

Այս ոլորտում թվերն ավելի քան խոսուն են․ 2018թ. խաղացողների կողմից գնվել է 333 մլրդ դրամի միավոր խաղ, իսկ 2019թ. այդ գումարն ավելացել է ավելի քան 3.3 անգամ՝ հասնելով 1.115 մլրդ դրամի։ 2020թ. միայն առաջին 10 ամիսներին այս թիվը հասել է 1.548 մլրդ դրամի: Ըստ որոշ գնահատականների՝ 2021թ. արդեն թիվը գերազանցել է 2 տրիլիոն դրամը:

Աննախադեպ չափով ավելացել է նաև խաղացողների թիվը՝ 2018-ից 2020թ․ աճելով գրեթե 2.5 անգամ՝ 18․093-ից հասնելով 44․082-ի: Այսինքն՝ 2020թ․, 2018-ի համեմատ, այս ոլորտի ընկերությունների կողմից գեներացված գումարներն առնվազն հնգապատկվել են՝ կազմելով ՀՆԱ-ի շուրջ 32%-ը:

Մանրամասները՝ տեսանյութում։

Մերի Մարտիրոսյան