Արմեն Սարգսյանի՝ բիզնեսով զբաղվելու, չհայտարարագրած գումարի մասին առաջիկայում ուսումնասիրության արդյունքներ կհրապարակվեն․ Հայկուհի Հարությունյան. ՏԵՍԱՆՅՈՒԹ

Factor TV-ի զրուցակիցը Կոռուպցիայի կանխարգելման հանձնաժողովի նախագահ Հայկուհի Հարությունյանն է

-Տիկի՛ն Հարությունյան, հետաքննող լրագրողները նախկին նախագահ Արմեն Սարգսյանին վերաբերող բացահայտում են կատարել ամիսներ առաջ։ Ըստ դրա՝ Արմեն Սարգսյանը չի հայտարարագրել 10 միլիոն շվեյցարական ֆրանկ։ Ինքը դա բացատրել է այսպես, թե հայտարարագրերն էլեկտրոնային չեն եղել և չէին պարտավորեցրել հայտարարագրել կոնկրետ բանկային հաշիվներ, միայն իր կանխիկ գումարներն է հայտարարագրել, այս դեպքում՝ 8 միլիոն եվրո է եղել հայտարարագիրը։ Հանձնաժողովն ի՞նչ է պարզել Արմեն Սարգսյանի վերաբերյալ, արդյո՞ք ապօրինություն կար։

-Թույլ տվեք հանձնաժողովի գործողությունների մասով հիմքերը հստակեցնել, այո՛, «Հետքի» հրապարակած տեղեկության հիման վրա, բայց խոսքը վերաբերվում է ոչ թե դրամական միջոցներին, այլ նորից համատեղելիության հնարավոր կամ առերևույթ խախտման փաստին, և տվյալներ էին հրապարակվել, որ արդեն որպես պետական պաշտոն զբաղեցնող անձ՝ Հանրապետության նախկին նախագահը միաժամանակ զբաղվել է բիզնես գործունեությամբ։

-Հանձնաժողովն ուսումնասիրում է Արմեն Սարգսյանին վերաբերող ևս մեկ հետաքննություն։ Ըստ տեղեկությունների՝ Սարգսյանը 9 տարի, այդ թվում՝ նախագահի պաշտոնը զբաղեցնելու ընթացքում, ֆրանսիական «VH Estate» ընկերությունում տնօրենի պաշտոն է զբաղեցրել և հայտարարագրում չի նշել այդ մասին։ Սահմանադրությունն արգելում է նախագահին զբաղվել նման գործունեությամբ։ Ի՞նչ է պարզվել։

-Այնտեղ մի քանի կազմակերպության մասին է խոսվում, մասնավորապես՝ վերջինի հետ տվյալների որոշակի անճշտություն կար, հանձնաժողովն այդ հիմքով սկսեց ուսումնասիրությունները։ Ուսումնասիրության հիման վրա հարցադրումներ ուղարկվեցին նախկին նախագահին, որը պատասխանեց, բայց, միևնույն ժամանակ, ընդամենը մեկ օրվա տարբերությամբ պաշտոնից հրաժարվելու դիմում ներկայացրեց։ Առաջ ընկնելով՝ ասեմ, որ գույքային դրության մասով Հանձնաժողովը մասամբ ուսումնասիրել էր, ուղղակի սպասում էինք նաև ստանալ պաշտոնի դադարեցման և արդեն 2021 թվականի հայտարարագրերը, որպեսզի Ձեր նշած դրամական միջոցների առկայության կամ դրանց համադրման վերլուծության արդյունքներն ավելի արժանահավատ և ճշգրիտ լինեն։ Առաջիկայում, քանի որ հայտարարագրերի ներկայացման ժամկետը 2022 թվականի մայիսի 31-ն է, Հանձնաժողովը համապարփակ վերլուծության արդյունքներով որոշակի տեղեկություններ կհրապարակի։

-Ինչ պարզվեց՝ Արմեն Սարգսյանը հայտարարագրե՞լ է 10 միլիոն ֆրանկի չափ գումար, թե՞ ոչ։

 -Խնդիրը հետևյալն է․ անկախ ներկայացրած պարզաբանման՝ նախկինում գործած խմբագրությամբ օրենքի առկայության դեպքում, միևնույն է, կանխիկ-անկանխիկ ընդհանուր դրամական միջոցները հայտարարագրելու մասին էր։ Ճիշտ է՝ տարբերակված չէին, թե որն էր կանխիկ, որը՝ անկանխիկ, ընդհանուր հանրագումարի տեսքով նշված գումարի վերաբերյալ հայտարարագրերում տեղեկություն չի եղել։

-Բայց պետք է լիներ այդպիսի տեղեկատվություն հայտարարագրում։

-Եթե արդեն փաստ է, և «Հետք»-ը հրապարակեց տեղեկություն, որ բանկային հաշվին առկա է եղել, կարծում եմ՝ վստահաբար պիտի լիներ։

Հարցազրույցն ամբողջությամբ՝ տեսանյութում։

Ռոբերտ Անանյան