Մեր երկրում հույզերը լարվել են, բևեռացումը` սրվել. Գիսանե Պալյան․ ՏԵՍԱՆՅՈՒԹ

«Ժամանակին ես սատարել եմ հեղափոխությանը, ինչպես շատերը, որոնք ուզում էին ազատվել արատավոր երևույթներից, հավատացած էինք, որ պետք է այդպես էլ լիներ, մեծ խանդավառությամբ անում էինք ամեն բան, որ կայանա հեղափոխություն, ինչի համար երբևէ չեմ զղջացել: Ես սատարել եմ հեղափոխությանը, ինչ վերաբերում է իշխանավորներին` հին կամ նոր, ոչ մեկի համար չկա իդեալական իշխանություն»,- Factor TV-ի հետ զրույցում նման տեսակետ է հայտնում «Էմփիրեյ» ռոք խմբի ստեղնահար, երգահան Գիսանե Պալյանը:

Նրա խոսքով` երկու ձեռքով անվերապահորեն ինչ-որ մեկի կամ ինչ-որ բանի կողմնակից լինելը սխալ է.

«Թե´ հին, թե´ նոր իշխանությունների գործելաոճում կան բաներ, որոնք ինձ դուր չեն գալիս: Հիմա մեր երկիրը կյանքի ու մահվան ծիրում է, բևեռացումն էլ այնքան է սրվել, հույզերն այնքան են լարվել, որ խոսքդ կարող է սխալ հասկացվել: Այսօր ես չեմ քննադատում իշխանությանը, որովհետև բավարար տեղեկատվություն չունեմ մեզ հետ կատարվողի մասին, անորոշության զգացումներ ունեմ: Ամեն դեպքում, ոչ մեկի հետ պալեմիկայի մեջ չեմ մտնում, չեմ թշնամանում, երբևիցե չեմ փորձի ինչ-որ մեկին մի բան ապացուցել»:

Գիսանե Պալյանը շեշտում է` այսօր հանրությունն ունի մտածող մարդկանց խոսքի կարիքը, բայց վերջիններս էլ արդեն բազմիցս խոսել են և մտածում են` որքան կարելի է նույն բաների մասին բարձրաձայնել. «Մտավորականությունը զոռբա չի լինում, դրա համար էլ ստվերում է մնում»,- ասում է նա:

Մանրամասները` տեսանյութում:

Աննա Բաբաջանյան