17.12.2025 | 14:50
Նոտարական գործարքներ՝ թվային միջավայրում․ ինչ փոփոխություններ են սպասվում Կադաստրի կոմիտեում․ ՏԵՍԱՆՅՈՒԹ
Մակրոնը՝ Պուտինի հետ երկխոսության անհրաժեշտության մասին
Քաղաքականություն
08.04.2022 | 20:54
Ֆրանսիայի նախագահական ընտրությունների առաջին փուլի շեմին երկրի նախագահ Էմանուել Մակրոնը պաշտպանել է իր որոշումը՝ բանակցել ռուս գործընկեր Վլադիմիր Պուտինի հետ՝ Ուկրաինայում Մոսկվայի սանձազերծած պատերազմից առաջ և հետո։ Ֆրանսիական Le Parisien-ին տված հարցազրույցում Մակրոնը պատմել է Կրեմլի հետ երկխոսությունը պահպանելու անշնորհակալ դերակատարության մասին, գրում է DW-ի ռուսական ծառայությունը։
Մակրոնը նշել է, որ «ժամեր» է անցկացրել ՌԴ նախագահի հետ զրույցում, ընդ որում՝ «յուրաքանչյուր քննարկում ցինիզմի ուղեկցությամբ է անցնում, իսկ դա երբեք հաճույք չի պատճառում»։
Միաժամանակ, Ֆրանսիայի նախագահն իր պարտքն է համարում այս երկխոսությունը շարունակելը, ընդգծել է նա և հավելել, որ զուր չի համարում բանակցությունները Կրեմլի հետ։
«Դրանք օգտակար են վաղվա աշխարհին պատրաստվելու համար», – ասել է Մակրոնը։
Նրա խոսքով՝ մինչև «մայիսի կեսերը» ինքը Եվրոպայում պատերազմից ելք չի տեսնում։ Միաժամանակ, Ֆրանսիայի նախագահը սուր քննադատության է ենթարկել Լեհաստանի վարչապետ Մաթեուշ Մորավիեցկիին, որը նրան մեղադրել է հանցագործների հետ բանակցելու մեջ։
Ֆրանսիայում նախագահական ընտրությունների առաջին փուլը կկայանա ապրիլի 10-ին, երկրորդ փուլը՝ ապրիլի 24-ին, եթե ոչ մի թեկնածու չստանա ձայների բացարձակ մեծամասնությունը։
Էմանուել Մակրոնն առաջադրվել է երկրորդ ժամկետով։ Ֆրանսիայի Սոցիալիստական կուսակցությունից նրա մրցակիցը Փարիզի քաղաքապետ Անն Իդալգոն է, Հանրապետական կուսակցությունից ընտրություններին մասնակցում է Վալերի Պեկրեսեն։ Բացի այդ, նախագահի պաշտոնին կրկին հավակնում է աջ պոպուլիստական «Ազգային ասոցիացիայի» առաջնորդ Մարին Լը Պենը։ Ընտրություններն ընթանում են ոչ միայն ուկրաինական պատերազմի ֆոնին, այլև 2022 թվականի առաջին կեսին ԵՄ-ում Ֆրանսիայի նախագահության ժամանակահատվածում։
Տաթև Ֆռանգյան
