Վաշինգտոնն ասում է, որ Թուրքիային F-16-երի հնարավոր վաճառքը համապատասխանում է ԱՄՆ-ի և ՆԱՏՕ-ի շահերին

Ջո Բայդենի վարչակազմը գտնում է, որ Թուրքիային F-16 կործանիչների հնարավոր վաճառքը համապատասխանում է ԱՄՆ ազգային անվտանգության շահերին և կծառայի ՆԱՏՕ-ի երկարաժամկետ միասնությանը։ Այս մասին ասվում է ԱՄՆ Պետքարտուղարության՝ Կոնգրեսին ուղղված նամակում, գրում է Reuters-ը։

Թուրքիան դեռ հոկտեմբերին դիմել էր ԱՄՆ-ին՝ 40 Lockheed Martin-ի F-16 կործանիչ և իր գործող ռազմական ինքնաթիռների համար շուրջ 80 արդիականացման համակարգ գնելու խնդրանքով: Վաշինգտոնն առայժմ ձեռնպահ է մնում վաճառքի վերաբերյալ որևէ կարծիք հայտնելուց՝ նշելով, որ այն պետք է անցնի զենքի վաճառքի ստանդարտ գործընթաց:

ԱՄՆ-ի կողմից զենքի վաճառքը ՆԱՏՕ-ի դաշնակից Թուրքիային վիճելի դարձավ, երբ Անկարան ռուսական արտադրության ՀՕՊ համակարգեր գնեց, ինչն էլ հանգեցրեց ամերիկյան պատժամիջոցներին և F-35 կործանիչների ծրագրից հեռացմանը։

Պետքարտուղարության նամակը, որն առաջին անգամ հրապարակում է լրատվամիջոցը, թվագրված է մարտի 17-ով և ստորագրված է Պետքարտուղարության օրենսդրական հարցերով բարձրաստիճան պաշտոնյա Նազ Դուրաքօղլուի կողմից։ Նամակը չի տրամադրում վաճառքի երաշխիք կամ ժամկետ և ընդգծում է, որ Վաշինգտոնի պատժիչ գործողություններն Անկարայի կողմից ռուսական C-400 համակարգերի գնումից հետո «վճարված զգալի գին են»:

«Վարչակազմը գտնում է, որ, այնուամենայնիվ, գոյություն ունեն ՆԱՏՕ-ի երկարաժամկետ միասնության և կարողությունների, ինչպես նաև ԱՄՆ ազգային անվտանգության, տնտեսական և առևտրային շահերը, որոնք աջակցվում են Թուրքիայի հետ ԱՄՆ-ի համապատասխան պաշտպանական առևտրային կապերով։ Առաջարկվող վաճառքը պահանջում է Կոնգրեսին ծանուցում, եթե Պետքարտուղարությունը հաստատի այն»,- ասվում է նամակում։

Պետքարտուղարության այս նամակը պատասխանն է դեմոկրատ կոնգրեսական Ֆրենկ Փալոնի և ավելի քան 50 երկկուսակցական օրենսդիրների կողմից փետրվարի 4-ին ուղարկված նամակին, որտեղ նրանք Բայդենի վարչակազմին կոչ էին անում մերժել Անկարայի դիմումը։

ԱՄՆ-ը, հիշեցնենք, պատժամիջոցներ է սահմանել Թուրքիայի պաշտպանական արդյունաբերության դեմ՝ ռուսական C-400-ների գնումից հետո։

Էմմա Չոբանյան