26.11.2024 | 20:29
Գերմանիան իրավունք չունի Taurus-ներ մատակարարել. Շոլց
Ռուսաստանում լրագրողներին կարգելվի մեջբերել «ֆեյք» ճանաչված լրատվամիջոցների հաղորդումները
Քաղաքականություն
07.04.2022 | 18:57
Ռուսաստանում լրագրողները պատասխանատվություն կկրեն այն լրատվամիջոցների հաղորդումները մեջբերելու համար, որոնք իշխանությունների կողմից անարժանահավատ են ճանաչված։ Այս մասին է վկայում չորեքշաբթի Պետդումա ներկայացված օրինագիծը։ Խոսքը, մասնավորապես, արտասահմանում ռուսական զինված ուժերի գործողությունների և նրանց վարկաբեկմանն ուղղված «ֆեյք» տեղեկատվության մասին է, գրում է BBC-ի ռուսական ծառայությունը։
Լրատվամիջոցների մասին գործող օրենքի համաձայն՝ կեղծ տեղեկատվության համար պատժվում է միայն այն լրատվամիջոցը, որն առաջինն է հրապարակել այն։ Իսկ այն լրատվամիջոցները, որոնք մեջբերել են հաղորդագրությունը, պատասխանատվություն չեն կրում։ Բացառություն է արվում միայն հանցագործություններից տուժած երեխաների անձնական տվյալների բացահայտման դեպքում։
Չորեքշաբթի մի խումբ պատգամավորների կողմից Պետդումա ներկայացված օրինագծով առաջարկվում է փոփոխություն կատարել «Զանգվածային լրատվության մասին» օրենքում և ընդլայնել բացառությունների թիվը, ինչը թույլ կտա պատասխանատվության ենթարկել այն լրատվամիջոցներին, որոնք ոչ թե «ոչ ճշգրիտ տեղեկատվության» առաջնային աղբյուր են եղել, այլ մեջբերել են այն։
Տաթև Ֆռանգյան
