17.12.2025 | 23:30
ՌԴ-ն երկրորդ անգամ է հայտարարել Կուպյանսկի նկատմամբ վերահսկողության մասին
Ամերիկացի գեներալը կանխատեսել է, որ Ուկրաինայում պատերազմը տարիներ կտևի, իսկ գերտերությունների միջև բախման հավանականությունը մեծանում է
Քաղաքականություն
06.04.2022 | 12:58
ԱՄՆ Զինված ուժերի շտաբների պետերի միացյալ շտաբի նախագահը զգուշացրել է, որ ժամանակակից աշխարհում մեծ տերությունների միջև զգալի միջազգային հակամարտության հավանականությունը մեծանում է, ոչ թե նվազում, գրում է VOA-ն։
«Ռուսաստանի զինված ներխուժումն Ուկրաինա ԱՄՆ-ի բանակում իմ 42-ամյա կարիերայի ընթացքում ամենալուրջ սպառնալիքն է Եվրոպայի և, հնարավոր է, աշխարհի խաղաղությանն ու անվտանգությանը։ Միացյալ Նահանգները գտնվում է կրիտիկական և պատմական, աշխարհառազմավարական շրջադարձային կետում: Մենք հայտնվում ենք մի աշխարհում, որն ավելի անկայուն է դառնում, և մեծ տերությունների միջև զգալի միջազգային կոնֆլիկտի ներուժը մեծանում է, այլ ոչ թե նվազում»,- ասել է գեներալ Մարկ Միլին Ներկայացուցիչների պալատի Զինված ծառայությունների հանձնաժողովում ելույթի ժամանակ:
Ըստ ամերիկացի բարձրաստիճան զինվորականի՝ Ռուսաստանը պահպանում է խոշոր և տարատեսակ միջուկային ներուժը, որպեսզի «սպառնա ԱՄՆ-ին ու իր դաշնակիցներին»։
«Մենք շատ սադրիչ հռետորաբանություն ենք լսել՝ կապված ռուսական միջուկային ուժերի պատրաստվածության մակարդակի հետ»,- ասել է շտաբի ղեկավարը։
Նա հավելել է, որ Ռուսաստանը բազմիցս ցուցադրել է «կիբերտարածությունում բարդ ու չարամիտ գործողություններ» իրականացնելու իր կարողությունն ու պատրաստակամությունը։
Բացի այդ, ըստ Միլիի, ռուսական ներխուժումն Ուկրաինա ստեղծել է «վտանգավոր պատմական շրջադարձ»: Նա զգուշացրել է, որ սխալ կլինի ակնկալել, որ Ուկրաինայում հակամարտությունը շուտափույթ ավարտ կունենա։
«Կարծում եմ, որ սա ձգձգվող հակամարտություն է, որը տարիներ կտևի։ Չգիտեմ՝ կարելի՞ է, արդյոք, խոսել տասնամյակների մասին, սակայն մի քանի տարին հաստատ է։ Կարծում եմ, որ ԱՄՆ-ը, ՆԱՏՕ-ն, Ուկրաինան և նրա բոլոր դաշնակիցներն ու գործընկերները կներքաշվեն դրա մեջ երկար ժամանակով»,- ասել է նա։
Տաթև Ֆռանգյան
