Աբրահամյանների դղյակի առնչությամբ Գլխավոր դատախազության բողոքը վերաքննիչ դատարանը դեռ չի քննել

Հովիկ Աբրահամյանի որդուն՝ Արգամ Աբրահամյանին պատկանող 5 մլն դոլարանոց առանձնատան վերաբերյալ Գլխավոր դատախազության բողոքը դեռ վերաքննիչ դատարանը չի քննել: Այս մասին Factor.am-ին փոխանցեցին Գլխավոր դատախազությունից՝ նշելով, որ նիստը տեղի կունենա առաջիկա օրերին:
Մոնումենտում գտնվող և քրեական գործերով անցնող շքեղ դղյակն Աբրահամյաններին հաջողվել էր վաճառել այս տարվա մարտի 1-ին: Մինչ այդ Արգամ Աբրահամյանին հաջողվել էր առանձնատան վրայից հանել կալանքը: Կալանքն Երևան քաղաքի առաջին ատյանի ընդհանուր իրավասության դատարանի որոշման հիման վրա հանել Սասուն Խաչատրյանի ղեկավարած Հակակոռուպցիոն կեմիտեն:

Հիշեցնենք, 2018 թվականին հարուցված քրեական գործով այդ դղյակը համարվում էր պաշտոնեական լիազորությունների չարաշահման իրեղեն ապացույց:
Գլխավոր դատախազությունը բողոքարկել է առաջին ատյանի ընդհանուր իրավասության դատարանի որոշումը: Գործընթացն առայժմ տեղից չի շարժվում:
Մինչ այս Արթուր Դավթյանը Factor.am-ի հարցին ի պատասխան տարակուսանք էր հայտնել, որ շքեղ առանձնատունը շտապ կալանքից հանվել ու վաճառվել է: Գլխավոր

Դատախազի այս պարզաբանումը սկանդալային բանավեճի առիթ դարձավ Սասուն Խաչատրյանի և Արթուր Դավթյանի միջև, որը տեևեց մի քանի օր:
Գլխավոր դատախազությունից այսօր Factor.am-ի հարցն անպատասխան թողեցին, թե ինչ է լինելու առանձնատան առքու վաճառքի գործարքի հետ, եթե վերաքննիչ դատարանը որոշի, որ տունը կրկին կալանքի տակ է մնալու: Դատախազությունից փոխանցեցին՝ կասպասեն վերաքննիչի որոշմանը:

Նշենք, որ այս առանձնատունը 5 մլն դոլարով գնել է նորահայտ մեծահարուստ գործարար Նարեկ Նալբանդյանը: Նա այս տարի գնել է նաև Ծաղկաձորի «Գոլդեն փելիս» հյուրանոցը:

Նարեկ Կիրակոսյան