16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Տնտեսական ճգնաժամի պայմաններում Թուրքիայի բնակչության 90 տոկոսն ապրում է աղքատության շեմից ցածր. նոր զեկույց
Քաղաքականություն
17.03.2022 | 23:08
Թուրքիայում ավելի քան 76,5 մլն մարդ (երկրի բնակչության ավելի քան 90%-ը) ներկայում ապրում է աղքատության շեմից ցածր։ Այս մասին գրում են թուրքական լրատվամիջոցները՝ վկայակոչելով Թուրքիայի Սպառողների իրավունքների ասոցիացիայի (THD) նոր զեկույցը։
Շուրջ 25,5 մլն մարդ ապրում է սովի շեմից ցածր՝ ամսական 4,433 թուրքական լիրայով, մինչդեռ լրացուցիչ 51 միլիոն սպառող ապրում է աղքատության շեմից ցածր՝ ամսական 5,584 թուրքական լիրայով։ Թուրքիայում մարդիկ բախվում են աննախադեպ գնաճի, որի հետևանքով երկրի բնակիչների մեծ մասն ընկել է ծայրահեղ աղքատության մեջ:
THD-ի նախագահ Թուրհան Չաքարը դատապարտել է Թուրքիայի քաղաքացիներին պատուհասած տնտեսական իրավիճակը։
«Մեր ժողովուրդն այս իրավիճակում է, քանի որ նախապատվությունը տրվել է կապիտալին, ոչ թե գնորդների իրավունքներին»,- ասել է նա՝ կոչ անելով լուծումներ գտնել՝ օգնելու մարդկանց բավարարել իրենց առաջնային կարիքները։
«Թուրքիայում օրեցօր ավելանում են սովն ու աղքատությունը։ Սպառողների մեծ մասը չի կարողանում բավարարել իր հիմնական կարիքները»,- ասելէ Չաքարը։
Ըստ նրա՝ Թուրքիան ստորագրել է Սպառողների համընդհանուր իրավունքների հռչակագիրը և պարտավոր է ապահովել իր սպառողների պաշտպանությունը։ Չաքարն ասել է, որ սպառողները պատշաճ կերպով պաշտպանված չեն, նրանց բողոքները լուրջ չեն ընդունվում՝ հավելելով, որ սպառողների պաշտպանությունը կարող է օգնել մարդկանց ոչ միայն խուսափել աղքատությունից, այլև կնպաստի երկրրի զարգացմանը։
«Մենք ակնկալում ենք, որ սպառողների համընդհանուր իրավունքները մեր երկրում ամբողջությամբ կիրականացվեն։ Սրանով սպառողները կարող են օգտվել իրենց իրավունքներից և ապահովել մեր երկրի զարգացումը»,- ասել է Չաքարը։
Էմմա Չոբանյան
