17.12.2025 | 15:14
Անկարան ու Բաքուն ռազմական համագործակցության հարցեր են քննարկել
Պատերազմը՝ թվերով․ որքա՞ն կորուստ են ունեցել Ուկրաինան և ՌԴ-ն․ օր 20-րդ․ ՏԵՍԱՆՅՈւԹ
Քաղաքականություն
15.03.2022 | 21:08
Ռուս-ուկրաինական պատերազմի ավարտը դեռ չի նշմարվում, իսկ կողմերի մարդկային և զինտեխնիկայի կորուստներն օր օրի աճում են։
Ուկրաինայի Զինված ուժերի գլխավոր շտաբը պնդում է՝ ռուսական կողմը ռազմական գործողությունների մեկնարկից ի վեր ունեցել է ավելի քան 13․500 զոհ։ Ըստ ուկրաինական կողմի՝ փոքր չեն նաև զինտեխնիկայի և զենք-զինամթերքի կորուստները։ Ըստ պաշտոնական Կիևի՝ ոչնչացվել է ռուսական բանակին պատկանող 81 ինքնաթիռ, 95 ուղղաթիռ, 404 տանկ, 1279 զրահամեքենա, 150 հրետանային համակարգ, 36 հակաօդային պաշտպանական սարք և 9 անօդաչու։
Ռուսաստանի Պաշտպանության նախարարությունը զերծ է մնում ուկրաինական կողմի զոհերին անդրադառնալուց։ Փոխարենը, պարբերաբար հայտնում է զինտեխնիկայի կորուստների մասին։ Ըստ ՌԴ ՊՆ-ի հրապարակած տվյալների՝ վերջին մեկ օրվա ընթացքում Ռուսաստանի օդատիեզերական ուժերի ավիացիոն և հակաօդային պաշտպանության համակարգերը խոցել են 16 օդային թիրախ՝ Ուկրաինայի ռազմաօդային ուժերի մեկական Սու-24 և Սու-25 ինքնաթիռ, մեկ Մի-8 ուղղաթիռ և 13 անօդաչու թռչող սարք, այդ թվում՝ վեց «Bayraktar TB-2»։ Պատերազմի մեկնարկից ի վեր Ուկրաինան կորցրել է 156 անօդաչու թռչող սարք, 1306 տանկ և այլ զրահամեքենա, 127 բազմակի հրթիռահրետանային կայանք, 471 դաշտային հրանոթ և ականանետ, ինչպես նաև 1054 միավոր հատուկ ռազմական տեխնիկա։
Նշենք՝ ՄԱԿ-ի տվյալներով՝ պատերազմի սկզբից ի վեր ավելի քան 3 միլիոն մարդ է լքել Ուկրաինան։ Փախստականների մեծ մասին ընդունել է Լեհաստանը՝ մոտ 1,8 մլն մարդ, ևս մոտ 450 հազարն ապաստանել է Ռումինիայում, 340 հազարը՝ Մոլդովայում։
Մանրամասները՝ տեսանյութում։
Ռոզա Վարդանյան
