26.11.2024 | 22:26
Իմ կալանքը ծառայում է Ադրբեջանի բռնապետության և նրա հանցակից ռուսական կայսրության շահերին․ Ադրբեջանում բանտարկված դիվանագետ
Սալիվանը չինացի բարձրաստիճան դիվանագետին զգուշացրել է՝ ՌԴ-ին աջակցելու համար Պեկինը կբախվի հետևանքների
Քաղաքականություն
15.03.2022 | 13:06
Սպիտակ տան ազգային անվտանգության հարցերով խորհրդական Ջեյք Սալիվանը նախօրեին ԱՄՆ-ի և Չինաստանի պաշտոնյաների միջև հանդիպման ժամանակ մտահոգություն է հայտնել Ռուսաստանի հետ Չինաստանի սերտ համագործակցության հետ կապված։ Այս մասին ասել է նախագահ Բայդենի վարչակազմի բարձրաստիճան պաշտոնյան, գրում է The Hill-ը։
Նրա խոսքով`ԱՄՆ-ի և Չինաստանի պաշտոնյաների հանդիպումը Հռոմում տևել է յոթ ժամ, քննարկման մի մասը նվիրված է եղել Ուկրաինա ռուսական ներխուժմանը։
Սալիվանը զգուշացրել է Չինաստանի բարձրաստիճան դիվանագետ Յան Ցզեչիին, որ Ռուսաստանին աջակցելու համար Պեկինը կարող է բախվել հետևանքների:
Հանդիպումը, որը Բայդենի վարչակազմի պաշտոնյաները բնութագրել են որպես «ինտենսիվ և անկեղծ», հաջորդել է տեղեկություններին, որ Ռուսաստանը ռազմական և տնտեսական աջակցություն է խնդրել Չինաստանից Ուկրաինա ներխուժման պայմաններում: Ամերիկյան վարչակազմի բարձրաստիճան պաշտոնյան, սակայն, հրաժարվել է ուղղակիորեն անդրադառնալ այդ լուրերին։
«Մենք լուրջ մտահոգություններ ունենք Ռուսաստանի և Չինաստանի մերձեցման հետ կապված, և ազգային անվտանգության հարցերով խորհրդականն ուղղակիորեն այս մտահոգություններն է արտահայտել և հայտնել որոշակի գործողությունների համար հետևանքների մասին»,- ասել է պաշտոնյան հանդիպմանը հաջորդած ճեպազրույցում։
Սպիտակ տան մամուլի քարտուղար Ջեն Փսակին էլ ասել է, որ Սալիվանը հայտնել է՝ Չինաստանը կբախվի «զգալի հետևանքների», եթե երկիրը Ռուսաստանին տրամադրի ռազմական կամ այլ աջակցություն, որը «կխախտի պատժամիջոցները կամ կաջակցի պատերազմին»։
Էմմա Չոբանյան
