19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Մենք տեղյակ ենք. Անահիտ Ավանեսյանը՝ քովիդի թեստերի բարձր գների մասին․ ՏԵՍԱՆՅՈՒԹ
14.03.2022 | 13:29
ՀՀ առողջապահության նախարարությունը տեղյակ է կորոնավիրուսի թեստերի՝ երբեմն հանդիպող շատ բարձր գնի խնդրին, անհրաժեշտության դեպքում համագործակցում է Մրցակցության պետական հանձնաժողովի հետ: Այս մասին ասաց նախարար Անահիտ Ավանեսյանը ՀՀ ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նիստում՝ անդրադառնալով հանձնաժողովի նախագահ Թագուհի Թովմասյանի հարցին:
Թովմասյանը նշեց՝ ՄՊՀ-ն վարույթ է հարուցել մի շարք ընկերությունների նկատմամբ, որոնք առերևույթ իրականացրել են անբարեխիղճ մրցակցային գործողություններ և գերթանկ գնով կորոնավիրուսի թեստեր են արել: «Ընկերությունները կորոնավիրուսի թեստերը գնում են 500-1500 դրամով, սակայն ծառայությունները մատուցում են 8000-15000 դրամով»,-ասաց պատգամավորն ու հետաքրքրվեց գնագոյացման, որակի վերաբերյալ:
Նախարարը, անդրադառնալով թեստերի վերաբերյալ խնդրին, հայտնեց, որ իրենք ևս տեղյակ են: «Անհրաժեշտության պարագայում ակտիվ համագործակցում են ՄՊՀ-ի հետ»,-ասաց Ավանեսյանը՝ չցանկացավ այլ գերատեսչություններին վերաբերող հարցի վերաբերյալ դիտարկումներ անել:
Այնուամենայնիվ, նախարարը նշեց, որ թեստերի արժեքը պետք է դիտարկել ժամանակի ընթացքում, որովհետև դրանք շատ կտրուկ փոփոխվել են, 2020 թվականից ի վեր գնային քաղաքականությունը տարբեր է եղել, ներմուծման շատ տարբեր գներ կան:
«Բայց պետք է հասկանանք, որ ինքնարժեքը ձևավորվում է ոչ միայն զուտ թեստի հիման վրա, այլ նաև լաբորատոր սարքավորումների, բուժաշխատողերի աշխատանքի: ՊՇՌ թեստավորման համար անհրաժեշտ լաբորատոր հզորությունները որոշակի բարձր հագեցվածություն են պահանջում, ինչը ևս ներդրումների, ծախսատարության տող է ստեղծում»,-ասաց նախարարը՝ կարևորելով ամբողջական դրանց գնագոյացման ամբողջական գնահատումը:
Մանրամասները՝ տեսանյութում:
