Քաղաքականություն
13.03.2022 | 11:25
Իրաքի հյւսիսային էրբիլ քաղաքի ուղղությամբ՝ ԱՄՆ հյուպատոսության մոտակայքում, 12 բալիստիկ հրթիռ է արձակվել, հայտնել են Իրաքի պաշտոնյաները: ԱՄՆ պաշտպանության նախարարի խոսքով՝ հրթիռներ են արձակվել քաղաքի ուղղությամբ հարևան Իրանից, այս մասին տեղեկացնում է AP-ն։
Տուժածների մասին տեղեկություններ չկան:
Իրաքի և ԱՄՆ-ի պաշտոնյաները տարբեր մեկնաբանություններ են տվել հարվածի և դրա պատճառած վնասի վերաբերյալ: Ըստ ԱՄՆ ներկայացուցչի՝ ԱՄՆ կառավարության որևէ հաստատություն չի վնասվել, և որ որևէ նշան չկա, որ թիրախը հյուպատոսության շենքն է, որը նոր է և ներկայումս չբնակեցված:
Իսկ Իրաքի ներկայացուցիչը նշել է, որ մի քանի հրթիռներ խոցել են ԱՄՆ հյուպատոսարանը, և որ այն եղել է հարձակման թիրախը: Ավելի ուշ, Իրաքի ներկայացուցիչը նշել է, որ հրթիռներից ոչ մեկը չի խոցել ԱՄՆ-ի օբյեկտը, սակայն համալիրի շրջակա տարածքները հրթիռակոծվել են:
ԱՄՆ պաշտոնյաները չեն կարողացել հաստատել հրթիռի տեսակը, միջադեպը հետաքննում են Իրաքի կառավարությունը և Իրաքի տարածաշրջանային ղեկավարությունը: ԱՄՆ-ը դատապարտել է«աղաղակող հարձակումը Իրաքի ինքնիշխանության դեմ և բռնության դրսևորում», ասվում է պաշտոնական հայտարարության մեջ:
Հարձակումը տեղի է ունեցել սիրիական Դամասկոսի մերձակայքում իսրայելական հարվածից մի քանի օր անց, որի հետևանքով սպանվել են «Իրանի հեղափոխության պահապանների կորպուս»-ի երկու անդամներ:
Իրանի արտաքին գործերի նախարարությունը խստորեն դատապարտել էր չորեքշաբթի հարձակումը և խոստացել է վրեժ լուծել:
