19.11.2024 | 23:34
Ինչ են քննարկել Հայաստանի և Գերմանիայի ԱԳ նախարարները
Բաքվում հայտարարել են Հայաստանի և Ադրբեջանի ԱԳ նախարարների հանդիպման պատրաստակամության մասին
Քաղաքականություն
12.03.2022 | 17:43
Բաքուն պատրաստ է Թուրքիայի Անթալիայում Ադրբեջանի և Հայաստանի ԱԳՆ ղեկավարների հանդիպմանը, այն կարող է իրականացվել Երևանի բարի կամքի դեպքում, հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերով բաժնի ղեկավար Հիքմեթ Հաջիևը:
«Ադրբեջանը պատրաստ է այդ հանդիպմանը (ԱԳ նախարարների–խմբ.)։ Հայաստանի բարի կամքի և մտադրության դեպքում այդ հանդիպումը կարող է իրականացվել»,- «ՌԻԱ Նովոստի»-ի փոխանցմամբ՝ հայտարարել է Հաջիևը լրագրողներին Անթալիայում դիվանագիտական ֆորումի շրջանակներում:
Ավելի վաղ ադրբեջանական ԱՊԱ գործակալությունը, վկայակոչելով Հաջիևին, հայտնել էր Անթալիայում դիվանագիտական համաժողովի շրջանակներում Ադրբեջանի և Հայաստանի ԱԳՆ ղեկավարների հանդիպման հնարավորության մասին:
Հիշեցնենք, որ այսօր՝ մարտի 12-ին, Անթալիայի դիվանագիտական ֆորումի շրջանակներում տեղի է ունեցել ՀՀ ԱԳ նախարար Արարատ Միրզոյանի և Թուրքիայի ԱԳ նախարար Մևլյութ Չավուշօղլուի հանդիպումը։
Ինչպես փոխանցում են ՀՀ ԱԳՆ-ից, արտգործանախարարները վերահաստատել են իրենց պատրաստակամությունը՝ իրականացնելու Հայաստանի և Թուրքիայի միջև հարաբերությունների լիարժեք կարգավորմանն ու բարիդրացիական հարաբերությունների հաստատմանն ուղղված գործընթացն առանց նախապայմանների։ Նրանք համակարծիք էին, որ կարգավորումն անհրաժեշտ է ողջ տարածաշրջանի համար։
