16.09.2026 | 19:14
Համաշխարհային օլիմպիադա. Շախմատի Հայաստանի հավաքականները մեկնարկեցին հաղթանակով
Դա թղթի կտոր է․ Ադրբեջանի Մեջլիսը դատապարտել է Եվրախորհրդարանի ընդունած Արցախի մշակութային ժառանգության ոչնչացման մասին բանաձևը
Քաղաքականություն
11.03.2022 | 20:01
Ադրբեջանի Միլլի Մեջլիսի միջազգային հարաբերությունների և միջխորհրդարանական կապերի հանձնաժողովն անդրադարձել է նախօրեին Եվրոպական խորհրդարանի ընդունած «Լեռնային Ղարաբաղում մշակութային ժառանգության ոչնչացման մասին» բանաձևին, գրում են ադրբեջանական լրատվամիջոցները։
«Այս բանաձևը, որը նպատակ ունի խաբել միջազգային հանրությանը, միանշանակ կարելի է անվանել «եվրոպական ժողովրդավարության հերթական մայրամուտ»,-ասվում է հայտարարության մեջ։
Նշվում է, որ Եվրախորհրդարանի այս բանաձևը, իբր, հակասում է ոչ միայն միջազգային մարդասիրական իրավունքի սկզբունքներին, այլև Եվրամիության կողմից ընդունված սկզբունքներին, որոնք դեմ են մշակութային և կրոնական հուշարձանների ոչնչացմանը։
«Եվրախորհրդարանի այս բանաձևը սովորական թղթի կտոր է, որը չի ստվերի ադրբեջանական ժողովրդի ազգային, հոգևոր և մշակութային բարձր արժեքները։ Ադրբեջանի Միլլի Մեջլիսը խստորեն դատապարտում է Եվրախորհրդարանի՝ կողմնակալ և կեղծ տեղեկատվություն տարածելու փորձն ու կոչ է անում զերծ մնալ տարածաշրջանում կարգավորման գործընթացին վնաս հասցնող սադրանքներից»,-ասվում է հայտարարությունում։
Հիշեցնենք՝ նախօրեին Եվրախորհրդարանը ձայների 635 կողմ, 2 դեմ և 42 ձեռնպահ հարաբերակցությամբ ընդունել էր «Լեռնային Ղարաբաղում մշակութային ժառանգության ոչնչացման մասին» բանաձևը:
Էմմա Չոբանյան
