Զելենսկին դարձել է առաջին օտարերկրյա ղեկավարը, որը ելույթ է ունեցել Մեծ Բրիտանիայի խորհրդարանում

Ուկրաինայի նախագահ Վլադիմիր Զելենսկիի ուղերձը բրիտանական խորհրդարանին առաջին օտարերկրյա ղեկավարի ելույթն է Համայնքների պալատում, գրում է DW-ի ռուսական ծառայությունը։

Նշվում է, որ Մեծ Բրիտանիայի խորհրդարանի ստորին պալատի անդամները հոտնկայս և բուռն ծափերով են դիմավորել Ուկրաինայի նախագահի տեսաուղերձը։  Ըստ բրիտանական լրատվամիջոցների՝ մարտի 8-ի նրա ելույթը օտարերկրյա պետության ղեկավարի առաջին ելույթն էր Համայնքների պալատում։

Իր խոսքում Զելենսկին ռուսական բանակի դեմ Ուկրաինայի պայքարը համեմատել է Երկրորդ համաշխարհային պատերազմում Մեծ Բրիտանիայի պայքարի հետ։ Նա խորհրդարանականներին հիշեցրել է Ուինսթոն Չերչիլի հայտնի ելույթի խոսքերը, որը խոստանում էր կռվել «լողափերում, դաշտերում, փողոցներում և բլուրներում»՝ վերափոխելով այն այսպես․ «Մենք կկռվենք անտառներում, դաշտերում, ափերին, քաղաքներում և գյուղերում, փողոցներում, մենք պայքարելու ենք բլուրների վրա։ Ցանկանում եմ իմ կողմից ավելացնել՝ մենք կկռվենք Կալմիուսի ու Դնեպրի ափերին։ Եվ մենք չենք հանձնվի»։

Ուկրաինայի նախագահը նաև շնորհակալություն է հայտնել Մեծ Բրիտանիայի վարչապետ Բորիս Ջոնսոնին աջակցության համար, միաժամանակ, կոչ է արել խստացնել պատժամիջոցները Մոսկվայի դեմ, Ռուսաստանը ճանաչել որպես ահաբեկչական պետություն և «միջոց գտնել՝ Ուկրաինայի երկինքը անվտանգ դարձնելու համար»։

Նա նաև նշել է, որ ռուսական գործողությունների 13 օրվա ընթացքում 50 երեխա է սպանվել։

Էմմա Չոբանյան