23.11.2024 | 19:28
Ֆուտբոլի կանանց ազգային հավաքականը սկսում է նախապատրաստվել ընկերական խաղերին
Ուկրաինական պատերազմի ֆոնին ԱՄՆ-ն բանակցում է Վենեսուելայի հետ էներգետիկ հարցերի շուրջ
Քաղաքականություն
08.03.2022 | 16:31
Ուկրաինայում ՌԴ-ի սանձազերծած պատերազմի ֆոնին ԱՄՆ-ն բանակցություններ է վարում Վենեսուելայի հետ էներգետիկ հարցերի շուրջ։ Այս մասին գրում է DW-ի ռուսական ծառայությունը։
Նախօրեին Կարակաս են ժամանել ԱՄՆ վարչակազմի բարձրաստիճան ներկայացուցիչներ, հայտնել է Սպիտակ տան պաշտոնական ներկայացուցիչ Ջեն Փսակին։
Բանակցությունների բովանդակության և դրանց արդյունքների մասին ոչինչ չի հաղորդվում։ Առաջին հանդիպումից հետո, որը տեղի է ունեցել անցած շաբաթավերջին ու առաջինն էր վերջին մի քանի տարվա ընթացքում, նախատեսված է նաև հաջորդ փուլը։ Այս մասին էլ հայտարարել է Վենեսուելայի նախագահ Նիկոլաս Մադուրոն։
Ուկրաինա ռուսական ներխուժման հետ կապված՝ ԱՄՆ-ն քննարկում է Ռուսաստանի Դաշնությունից նավթի և գազի ներկրման հնարավոր արգելքի հարցը, Վենեսուելան էլ, որը երկար տարիներ ծանր քաղաքական և տնտեսական ճգնաժամի մեջ է, կարող է այլընտրանքային մատակարար դառնալ։
Ավելի վաղ Վաշինգտոնը Կարակասի դեմ պատժամիջոցներ էր սահմանել, իսկ նախագահ Մադուրոյին մեղադրել թմրանյութերի վաճառքի ու փողերի լվացման մեջ։
Նշենք, որ Վենեսուելան աշխարհի ամենամեծ նավթային պաշարներով երկրներից մեկն է։
Էմմա Չոբանյան
