Քաղաքականություն
08.03.2022 | 14:35
Եվրամիության առաջնորդներն այս շաբաթ կայանալիք գագաթնաժողովում կհամաձայնվեն աստիճանաբար վերացնել ԵՄ-ի կախվածությունը ռուսական գազի, նավթի և ածուխի ներմուծումից։ Այս մասին ասվում է հայտարարության նախագծում, որը շրջադարձային կետ է Մոսկվայի նկատմամբ Միության քաղաքականության մեջ, գրում է Reuters-ը։
ԵՄ առաջնորդները հինգշաբթի և ուրբաթ կհանդիպեն Վերսալում՝ քննարկելու իրենց համատեղ պաշտպանական կարողությունների բարձրացումը և դաշինքին անդամակցելու՝ Ուկրաինայի հայտը:
«Մենք պայմանավորվել ենք աստիճանաբար դադարեցնել մեր կախվածությունը ռուսական գազի, նավթի և ածխի ներկրումից»,- ասվում է առաջնորդների հայտարարության նախագծում, որը հայտնվել է Reuters-ի տրամադրության տակ։
Այս առաջադրանքը բավական բարդ է, քանի որ ԵՄ-ն ՌԴ-ից գնում է ընդհանուր ներկրվող գազի 45%-ը, նավթի մոտ մեկ երրորդը և ածխի գրեթե կեսը: Սա Միությանը խոցելի է դարձնում, եթե Ռուսաստանը որոշի հակահարված տալ ԵՄ քաղաքականությանը՝ սահմանափակելով արտահանումը:
Նշվում է, որ այս որոշումը նաև շրջադարձային կետ է, քանի որ անցյալ տարի Գերմանիան դեռ առաջ էր մղում ռուսական «Հյուսիսային հոսք 2» գազատարի գործարկումը, մինչդեռ Իտալիան, Ավստրիան կամ Հունգարիան, որոնք ԵՄ երկրներից ամենաշատն են կախված ռուսական էներգակիրներից, չէին շտապում այլընտրանքներ որոնել։ Հիմա, սակայն, ռուսական ներխուժումն Ուկրաինա փոխել է ամեն ինչ։
«Ռուսաստանի ագրեսիվ պատերազմը տեկտոնական տեղաշարժ է Եվրոպայի պատմության մեջ։ Բախվելով աճող անկայունությանը, ռազմավարական մրցակցությանն ու անվտանգային սպառնալիքներին՝ մենք որոշեցինք ավելի շատ պատասխանատվություն վերցնել մեր անվտանգության համար ու հետագա որոշիչ քայլեր իրականացնել՝ կառուցելու մեր եվրոպական ինքնիշխանությունը, նվազեցնելով մեր կանխվածությունները և 2030 թվականի համար նախագծելով աճի ու ներդրումների նոր մոդել»,- ասվում է ԵՄ առաջնորդների հայտարարության նախագծում։
Էմմա Չոբանյան
