Որ դիմենք, անպայման կիմանաք․ Փաշինյանի փաստաբանը՝ գրիչի գործով վերաքննիչ բողոք ներկայացնելու մասին

Երևան քաղաքի ընդհանուր իրավասության դատարանի դատավոր Գայանե Խաչատրյանի վճռով՝ ՀՀ վարչապետ Նիկոլ Փաշինյանը պարտավորեցվել է հերքել Սահմանադրական դատարանի նախկին նախագահ Հրայր Թովմասյանի վերաբերյալ զրպարտություն պարունակող հայտարարությունները։ Նիկոլ Փաշինյանի փաստաբան Գևորգ Գյոզալյանն ասել էր, որ Փաշինյանը համաձայն չէ առաջին ատյանի դատարանի որոշման հետ և վերաքննիչ բողոք են ներկայացնելու։ Factor.am-ը փաստաբանից հետաքրքրվեց՝ արդյո՞ք բողոքն արդեն ներկայացվել է։

«Այս պահի դրությամբ այդ գործի հետ կապված ասելիք չունեմ, Ձեզ չեմ կարող տեղեկություն տալ»,- ասաց փաստաբանը։

Հստակեցնող հարցին՝ այսինքն՝ դեռ չե՞ն դիմել, Գևորգ Գյոզալյանը պատասխանեց․ «Պարզապես որևէ բան չի փոխվել, որ դիմենք, անպայման կիմանաք»։

Հիշեցնենք՝ երկու տարի առաջ Փաշինյանը պնդել էր, թե Հրայր Թովմասյանը հեղափոխությունից հետո իր ծառայություններն է առաջարկել նոր իշխանություններին։ Հրայր Թովմասյանը դատարանին խնդրել էր Փաշինյանին պարտավորեցնել վիրավորանք հանդիսացող արտահայտությունների համար ներողություն խնդրել, ինչպես նաև հերքել զրպարտություն հանդիսացող տեղեկությունները։ Դատարանը հայցը բավարարել է մասնակի և Նիկոլ Փաշինյանին պարտավորեցրել վճիռն օրինական ուժի մեջ մտնելուց հետո, հինգ աշխատանքային օրվա ընթացքում, Facebook սոցիալական կայքի՝ Նիկոլ Փաշինյանին պատկանող պաշտոնական էջում «Հերքում՝ Հրայր Թովմասյանի հասցեին կատարված զրպարտություն հանդիսացող տեղեկության վերաբերյալ» վերնագրով գրառում կատարել` դրանում նշելով հետևյալը. «Ես՝ Նիկոլ Փաշինյանս, հերքում եմ իմ այն պնդումը, որ Հրայր Թովմասյանը 2018 թվականի մայիսից սկսած ինձ իր ծառայություններն է առաջարկել»:

Նշենք, որ եթե Նիկոլ Փաշինյանը Facebook-ում հերքում չտեղադրի, ապա կպարտավորվի հանդես գալ հերքմամբ առնվազն 5000 (հինգ հազար) տպաքանակ և Հայաստանի Հանրապետության ողջ տարածքում սպառում ունեցող որևէ տպագիր թերթի միջոցով՝ հրապարակելով հերքման տեքստը։

Հավելենք նաև, որ Հրայր Թովմասյանի հայցապահանջը՝ ներողություն խնդրել պարտավորեցնելու մասով, մերժվել է։ Դատարանը գտել է, որ Նիկոլ Փաշինյանի հայտարարությունը, թե Թովմասյանն ու նրա թիմն օկուպացրել են Սահմանադրական դատարանը, գնահատողական է։ Վճիռն օրինական ուժի մեջ կմտնի հրապարակման պահից մեկ ամիս հետո՝ մարտի 18-ին, եթե դրա դեմ վերաքննիչ բողոք չներկայացվի։

Արփի Հակոբյան