Ռուսաստանում կպատժեն ԶՈՒ-ի վերաբերյալ «կեղծ լուրերի տարածման համար»

ՌԴ Պետդուման միաձայն և միանգամից երեք ընթերցմամբ ընդունել է Քրեական օրենսգրքում փոփոխությունները, որոնք պատիժ են սահմանում «ՌԴ ԶՈՒ-ի գործողությունների վերաբերյալ ակնհայտ կեղծ տեղեկություններ տարածելու համար» , գրում է BBC-ի ռուսական ծառայությունը։
«Կեղծ տեղեկություններ» տարածելու պատասխանատուներին սպառնում է մինչև երեք տարվա ազատազրկում։
Եթե կեղծիքը տարածվում է կազմակերպված խմբի կողմից կամ ուղեկցվում է ապացույցների կեղծմամբ, առավելագույն պատիժը կհասնի 10 տարվա ազատազրկման։ Եթե ոչ հավաստի տեղեկությունների տարածումը լուրջ հետեւանքներ առաջացնի, ապա   սպառնում է մինչև 15 տարվա ազատազրկում։
Պետդուման նաև օրենք է ընդունել, որը նախատեսում է մինչև երեք տարի ազատազրկում Ռուսաստանի Դաշնության դեմ պատժամիջոցներ կիրառելու կոչերի համար։
Բացի այդ, փոփոխությունները նախատեսում են նաև ՌԴ զինված ուժերի վարկաբեկման արգելք։ Այս կարգի առաջին խախտումը կհանգեցնի վարչական պատասխանատվության, իսկ երկրորդը՝ արդեն քրեական՝ 100-ից 300 հազար ռուբլու չափով տուգանքի կամ մինչև երեք տարի ժամկետով ազատազրկման։
Ավելի վաղ Ռոսկոմնադզորը հայտարարել էր, որ ռուսական լրատվամիջոցները ռազմական գործողությունները պետք է լուսաբանեն միայն ռուսական պաշտոնական աղբյուրներից ստացվող տեղեկատվության հիման վրա։ Գերատեսչությունը լրատվամիջոցներից պահանջել է հեռացնել հոդվածները, որոցում Ուկրաինայում տեղի ունեցողը «պատերազմ» կամ «հարձակում» են անվանել, և արդեն արգելափակել է մի քանի ռուսական անկախ լրատվամիջոցներ։

Տաթև Ֆռանգյան