16.12.2025 | 21:33
Մաշտոցը կլինի թղթի վրա, իսկ հեռախոսները՝ միայն դասի համար. Ժաննա Անդրեասյանի արձագանքը՝ քննադատություններին
Հաագայի Միջազգային քրեական դատարանը հետաքննություն է սկսել Ուկրաինայում ՌԴ-ի գործողությունների վերաբերյալ
Քաղաքականություն
03.03.2022 | 12:18
Միջազգային Քրեական դատարանի գլխավոր դատախազ Քարիմ Խանը հայտնել է, որ ՌԴ-ի կողմից վերջին տարիներին Ուկրաինայում իրականացված հնարավոր ռազմական հանցագործությունների վերաբերյալ հետաքննությունն է սկսվել, գրում է BBC-ի ռուսական ծառայությունը։
«Ուկրաինայում իրավիճակի նախնական վերլուծությունից հետո իմ գրասենյակը բավարար հիմքեր տեսավ համարելու, որ այնտեղ տեղի ունեցած հնարավոր հանցագործությունները կարող են հայտնվել մեր դատարանի իրավասության ներքո: Կոնկրետ դեպքերը, որոնք կարելի է դիտարկել որպես այդպիսին, արդեն ի հայտ են եկել և դրված են հետաքննության հիմքում»,-ասել է գլխավոր դատախազը։
Նշվում է, որ Ուկրաինայում հնարավոր ռազմական հանցագործությունների հետաքննությունը սկսվել է այն բանից հետո, երբ տեղեկություններ են ի հայտ եկել այն մասին, որ ռուս զինվորականները կրակում են խաղաղ բնակիչների վրա։
Հաղորդվում է, որ Հաագայի դատարանը քննարկելու է ներկայի ու անցյալի ռազմական հանցագործությունների, մարդկության դեմ հանցագործությունների, ցեղասպանության մեջ մեղադրանքները։ Դիտարկվելու են գործողությունները 2013թ-ից սկսված։
Ավելի վաղ գլխավոր դատախազ Քարիմ Խանը հայտարարել էր, որ մտադիր է դիմել նախագահական խորհրդին հետաքննություն սկսելու թույլտվություն ստանալու համար, սակայն 38 երկրների տրիբունալին ուղղված դիմումը նրան հիմք է տվել անհապաղ սկսելու աշխատանքը: Մեծ Բրիտանիան առաջնային դեր է խաղացել՝ դաշնակիցներին համախմբելով Հաագայի միջազգային տրիբունալին դիմելու համար, այս մասին ասվում է Մեծ Բրիտանիայի ԱԳՆ հայտարարության մեջ։
«Որպես երկիր, որը մասնակցել է Միջազգային քրեական դատարանի ստեղծմանը, Մեծ Բրիտանիան պատրաստ է անհրաժեշտ տեխնիկական օգնություն ցուցաբերել մեղադրական դատավճիռների հասնելու համար։ Ցանկացած ռուս առաջնորդ կամ սպա, որը տվել է հանցավոր հրամաններ, պետք է իմանա, որ կհայտնվի մեղադրյալի աթոռին, վերջնարդյունքում էլ՝ բանտում»,-ասել է Մեծ Բրիտանիայի արդարադատության նախարար Դոմինիկ Ռաաբը։
Բրիտանիայի ԱԳ նախարար Լիզ Թրասն էլ հայտարարել է, որ Լոնդոնը սերտ համագործակցելու է իր դաշնակիցների հետ՝ արդարության հասնելու համար։
Հիշեցնենք, որ Ռուսաստանը ստորագրել է Ժնևի կոնվենցիան, որում միջազգային իրավունքի համաձայն՝ սահմանված են ռազմական հանցագործությունները, սակայն 2016 թվականին ՌԴ-ը դուրս է եկել Միջազգային քրեական դատարանից։
Էմմա Չոբանյան
